प्रधानमन्त्री बालेन्द्र साहले ‘नेपालले भारतको धेरै ठाउँ मिचेको छ’ भन्ने अभिव्यक्ति दिएपछि नेपाली कांग्रेसले संसदमा माफी नमागेसम्म बैठक चल्न नदिने चेतावनी दिएको छ। राष्ट्रिय सभाका सचेतक पदमबहादुर परियारले मंगलबारको बैठकमा विशेष समय लिएर बोल्दै प्रधानमन्त्रीको अभिव्यक्तिलाई घोर आपत्तिजनक र निन्दनीय ठहर गरेका हुन्।
सचेतक परियारले प्रधानमन्त्री साहमाथि कूटनीति र राजनीति सम्बन्धी सामान्य ज्ञानको समेत अभाव रहेको आरोप लगाए। उनले सरकार प्रमुखबाटै नेपालले भारतीय भूमि मिचेको स्वीकारोक्ति आउनु राष्ट्रघाती भएको आरोप लगाए। लिम्पियाधुरा, लिपुलेक र कालापानीसहित करिब ३७२ वर्ग किलोमिटर भूभाग भारतद्वारा अतिक्रमित भएको अवस्थामा यस्तो अभिव्यक्ति आउनु गैरजिम्मेवारपूर्ण भएको उनको भनाइ थियो।
परियारले सीमा समस्याबारे बेलायतसँग कुरा भइरहेको भन्ने प्रधानमन्त्रीको दाबीलाई हास्यास्पद र संवेदनशील भन्दै त्यो सरकारको आधिकारिक धारणा हो कि राष्ट्रिय स्वतन्त्र पार्टीको मात्र भनेर प्रश्न उठाए। उनले प्रधानमन्त्रीको भनाइ अक्ष्यम्य, आपत्तिजनक र घोर निन्दनीय भएको र यसले उहाँको कमजोर राजनीतिक चेतलाई उजागर गरेको बताए।
कांग्रेसले राष्ट्रिय स्वतन्त्र पार्टीका सभापति रवि लामिछानेको हालैको भारत भ्रमणप्रति पनि असन्तुष्टि जनाएको छ। परियारले लामिछानेले भारत भ्रमणका क्रममा दुई मुलुकबीचको सम्बन्धलाई साँघुरो घेराबाट व्याख्या गरेको आरोप लगाए।
कांग्रेसले संसदमा स्पष्ट माग राख्दै प्रधानमन्त्री साहले कुन ठाउँमा र कति भारतीय भूमि नेपालले मिचेको हो, त्यसको तथ्य र प्रमाणसहित जवाफ दिनुपर्ने वा आफ्नो गल्ती स्वीकार्नुपर्ने अडान लिएको छ। परियारले प्रधानमन्त्रीले संसदमा ‘मैले तथ्यभन्दा बाहिर र आवेशमा आएर बोलेँ, आईएम सरी’ भन्न सक्ने हिम्मत राख्नुपर्ने बताए।
यदि प्रधानमन्त्रीले संसदमा आएर माफी नमागे नेपाली कांग्रेसलगायत विपक्षी दलहरूले यथास्थितिमा सदनको कारबाही अगाडि बढाउन नदिने परियारले स्पष्ट पारे। उनले विना प्रमाण सीमा जस्तो संवेदनशील विषयमा सरकार प्रमुखलाई जथाभाबी बोल्ने छुट नभएको जिकिर गरे।
