निर्माण उद्योग गम्भीर संकटमा परेको भन्दै नेपाल निर्माण व्यवसायी महासंघले पूर्वाधार विकास मन्त्री सुनिल लम्साललाई ४ बुँदे मागसहित ध्यानाकर्षण पत्र बुझाएको छ। मंगलबार मन्त्री लम्साललाई भेटेर बुझाइएको पत्रमा मूल्यवृद्धिका कारण प्रभावित ठेक्कामा तत्काल मूल्य समायोजन गर्नुपर्ने मुख्य माग छ।
त्यस्तै, सबै प्रभावित आयोजनाहरूको एकमुष्ट म्याद थप, रुग्ण आयोजनाहरूको वैज्ञानिक व्यवस्थापन र कालोसूचीमा रोक लगाउनुपर्ने विषय पनि महासंघले उठाएको छ। मन्त्रालयबाट जारी भएका अव्यावहारिक निर्देशनहरू तत्काल फिर्ता लिनुपर्ने माग पनि महासंघले गरेको छ।
ध्यानाकर्षण पत्र बुझ्दै मन्त्री लम्सालले निर्माण व्यवसायीका समस्याहरूप्रति सरकार संवेदनशील रहेको बताए। उनले समस्याको दीर्घकालीन र व्यावहारिक समाधानका लागि मन्त्रालयले आवश्यक गृहकार्य र समन्वय गरिरहेको जानकारी दिए।
