एमालेको बजेटको ठहर: गैरजिम्मेवार र हावादारी, स्रोतको अभाव
प्रमुख प्रतिपक्ष दल नेकपा एमालेले आगामी आर्थिक वर्ष २०८३/८४ को बजेटलाई ‘गैरजिम्मेवार र हावादारी’ ठहर गरेको छ। शनिबार सिंहदरबारमा बसेको संसदीय दलको बैठकले बजेटले जनताको भावना र देशको आवश्यकता सम्बोधन गर्न नसकेको निष्कर्ष निकालेको छ।
प्रमुख सचेतक ऐनबहादुर महरले बजेट निमुखा वर्गको हितमा नरहेको र रूपान्तरणकारी योजनाको अभाव रहेको बताए। उनले दुई तिहाइ बहुमतको सरकारबाट समेत अपेक्षित बजेट आउन नसकेको उल्लेख गरे। महरले बजेटका लागि स्रोतको सुनिश्चितता नभएकोमाथि प्रश्न उठाए।
एमालेले शिक्षा, कृषि र पर्यटनजस्ता महत्वपूर्ण क्षेत्रलाई बजेटले प्राथमिकता नदिएको आरोप लगाएको छ। पार्टीले बजेटका प्राविधिक पक्षबारे छलफल गर्न पूर्वअर्थमन्त्रीहरू विष्णु पौडेल, सुरेन्द्र पाण्डे, डा. युवराज खतिवडा र योजना आयोगका पूर्वउपाध्यक्ष डा. शिवराज अधिकारी जस्ता विज्ञहरूको सहजीकरणमा बैठक सम्पन्न गरेको थियो।
प्रतिनिधिसभा नियमावलीमा ‘बेइमानी’ को आरोप र प्रतिरोधको निर्णय
बैठकले प्रतिनिधिसभा नियमावली सम्बन्धी विषयमा सत्ता पक्षले ‘बेइमानी’ गर्न खोजेको भन्दै प्रतिरोध गर्ने निर्णय गरेको छ। संविधान संशोधनको भावना विपरीत प्रावधान अघि बढाउन खोजिएको भन्दै एमालेले नियमावली पेस गर्ने कार्यसूचीको विरोध गर्ने जनाएको छ। बैठकले मानवअधिकार आयोगले सार्वजनिक गरेको प्रतिवेदनबारे पनि समीक्षा गरेको थियो।
