स्थल सीमा नाकाबाट ५ सय रुपैयाँसम्मका निजी प्रयोगका सामान ल्याउँदा वा लैजाँदा भन्सार महसुल नलाग्ने व्यवस्था कार्यान्वयनमा आएको छ। अर्थ मन्त्रालयले राजपत्रमा सूचना प्रकाशित गरी यो नयाँ नियम सार्वजनिक गरेको हो।
यो सीमा यसअघि १ सय रुपैयाँ थियो। नयाँ व्यवस्था अनुसार, यात्रुले आफ्नो साथमा ल्याउने वा लैजाने ५ सय रुपैयाँसम्मका निजी प्रयोगका वस्तुहरुको हकमा भन्सार प्रमुखले औचित्य हेरी महसुल नलिई छाड्न सक्नेछन्।
यो निर्णयले सीमा क्षेत्रका व्यवसायीलाई राहत दिएको छ। यसअघि १ सय रुपैयाँको सीमा लागू गर्दा केही साताअघि सीमा नाकामा तनाव उत्पन्न भएको थियो। संसदमा समेत यो विषयले प्रवेश पाएको थियो। अर्थमन्त्री डा. स्वर्णिम वाग्लेले सीमा बढाउने आश्वासन दिएका थिए।
यद्यपि, स्थलमार्गबाट ओहोरदोहोर गर्ने यात्रुलाई हवाईमार्गबाट आवतजावत गर्ने सरहको सुविधा भने दिइएको छैन। भारतमा अध्ययन गर्ने नेपाली विद्यार्थीका लागि भने ट्याब्लेट वा कम्प्युटरमध्ये कुनै एक थान नेपाल ल्याउँदा महसुल नलाग्ने पुरानो व्यवस्था यथावत राखिएको छ।
