मौसम पूर्वानुमान महाशाखाले बंगालको खाडीमा विकसित न्यूनचापीय प्रणाली कात्तिक ९ गते (अक्टोबर २६) चक्रवातीय आँधीमा परिणत हुने र कात्तिक ११ देखि १५ गतेसम्म नेपालमा भारी वर्षाको सम्भावना रहेको जनाएको छ। महाशाखाले शुक्रबार साँझ जारी गरेको सूचनामा यसबाट कृषि तथा पर्यटन क्षेत्रमा गम्भीर असर पर्न सक्ने भन्दै सतर्क रहन आग्रह गरेको छ।
जल तथा मौसमविद् डा. विनोद पोखरेलका अनुसार कात्तिक १२ देखि १४ गतेसम्म देशका विभिन्न स्थानमा भारी वर्षाको सम्भावना बढी छ। यसअघि Nmkhabarले बङ्गालको खाडीमा चक्रवातको सम्भावना बढेको र किसानलाई धान नकाट्न आग्रह गरिएको समाचार प्रकाशित गरेको थियो।
चक्रवातको विकास र नेपालमा सम्भावित प्रभाव
मौसम पूर्वानुमान महाशाखाका अनुसार पूर्वमध्य तथा दक्षिणपूर्वी बंगालको खाडी आसपास विकसित न्यूनचापीय प्रणाली क्रमशः बलियो हुँदै कात्तिक ९ गते (अक्टोबर २६) चक्रवातीय आँधीमा विकसित हुने सम्भावना छ। उक्त प्रणाली पश्चिम–उत्तरपश्चिम दिशातर्फ अघि बढ्दै भारतको उत्तर आन्ध्र प्रदेश तथा दक्षिण ओडिसा आसपासको तटबाट जमिनमा प्रवेश गर्ने अनुमान गरिएको छ।
यस प्रणालीको अप्रत्यक्ष प्रभावले नेपालमा कात्तिक ११ गते बुधबारदेखि १५ गते आइतबारसम्म मौसम बदली तथा वर्षा गराउन सक्नेछ। यद्यपि, नेपालमा कति वर्षा हुन्छ, जोखिमको स्तर कस्तो रहन्छ र यसले कस्तो असर पार्न सक्छ भन्ने विषयमा अहिले नै यकिन गर्न नसकिने महाशाखाको भनाइ छ। वर्षा सुरु हुने समय, प्रभावित क्षेत्र र वर्षाको मात्रा फरक पर्न सक्ने सम्भावना पनि रहेको छ।
किसान र पर्यटन व्यवसायीलाई आग्रह
सम्भावित प्रतिकूल मौसमले कृषि तथा पर्यटन क्षेत्रमा प्रत्यक्ष असर पार्न सक्ने भएकाले सम्बन्धित सबैलाई सतर्क रहन महाशाखाले आग्रह गरेको छ। धान पाकिसकेको र काटेर सुकाई सुरक्षित रूपमा भित्र्याउन पर्याप्त समय रहेको अवस्थामा स्थानीय मौसमको अवस्था हेरेर मंगलबारअघि नै धान भित्र्याउने योजना बनाउन जल तथा मौसमविद् डा. विनोद पोखरेलले किसानलाई आग्रह गरेका छन्।
यसैगरी, उच्च हिमाली क्षेत्रमा भारी हिमपात र चिसो बढ्न सक्ने सम्भावना रहेकाले पदयात्रा तथा अन्य प्रयोजनका लागि हिमाली क्षेत्रमा जानेहरूले नियमित मौसम पूर्वानुमान र आधिकारिक सूचनाका आधारमा यात्रा योजना बनाउनुपर्ने डा. पोखरेलले बताएका छन्।
अद्यावधिक जानकारीका लागि महाशाखाको अनुरोध
मौसम पूर्वानुमान महाशाखाले मौसमसम्बन्धी मोडल तथा भू–उपग्रहबाट प्राप्त तस्बिर र तथ्याङ्कको विश्लेषणका आधारमा उक्त प्रणालीको विकासक्रमबारे निरन्तर निगरानी गरिरहेको छ। प्रणालीको अवस्था र सम्भावित प्रभावबारे थप जानकारी प्राप्त भएपछि आवश्यकताअनुसार सूचना अद्यावधिक गरिने जनाइएको छ।
महाशाखाले मौसमसम्बन्धी आधिकारिक तथा अद्यावधिक जानकारीका लागि विभागबाट जारी हुने सूचनालाई नियमित रूपमा हेर्न अनुरोध गरेको छ।
यसअघि: बङ्गालको खाडीमा चक्रवातको सम्भावना: किसानलाई धान नकाट्न मौसमविद्को आग्रह
