नेपाली कांग्रेसकी प्रमुख सचेतक वासना थापाले दैलेखमा भइरहेको पेट्रोलियम उत्खनन परियोजनालाई सरकारले तीव्र गतिमा अघि बढाउनुपर्नेमा जोड दिएकी छन्।
भक्तपुरमा रफत सञ्चार क्लबले आयोजना गरेको अन्तरसंवादमा बोल्दै थापाले सुर्खेत–दैलेख सडकमार्गको स्तरोन्नति नहुँदा उत्खनन कार्य प्रभावित भएको बताइन्। यो परियोजना देशकै आर्थिक अवस्था कायापलट गर्न सक्ने तथा ५० वर्षभन्दा बढी समय नेपाली उपभोक्तालाई उपयोगी हुने सम्भावना बोकेको उनको धारणा थियो।
थापाले सरकारको नीति तथा कार्यक्रमका सकारात्मक पक्षलाई कांग्रेसले समर्थन गर्ने स्पष्ट पारिन्। कांग्रेस विभाजनको सङ्घारमा पुगेको भन्ने चर्चा असत्य रहेको पनि उनले उल्लेख गरिन्।
प्रमुख सचेतक थापाले कांग्रेस र प्रजातन्त्रको सौन्दर्य नै गुटउपगुट तथा आन्तरिक मन्थन भएको जिकिर गरिन्। यसले पार्टीभित्रको लोकतान्त्रिक प्रक्रियालाई बलियो बनाउने उनको आशय थियो।
