गृहमन्त्री सुधन गुरुङले पदभार सम्हाल्दै २०५८ जेठ १९ को दरबार हत्याकाण्डको फाइल खोल्ने निर्णय गरेका छन्। यो निर्णयसँगै उक्त घटनाको थप अनुसन्धान प्रक्रिया अघि बढ्नेछ।
नारायणहिटी राजदरबार हत्याकाण्डबारे यसअघि भएका प्रतिवेदनहरुको अध्ययन गरी थप छानबिन गरिनेछ। राजा वीरेन्द्र शाहको वंशनाश हुने गरी भएको यो घटना नेपालको इतिहासमा कालो दिन मानिन्छ।
यस्तै, गृहमन्त्री गुरुङले जेनजी आन्दोलनका फौजदारी मुद्दा फिर्ता लिने विषयमा अध्ययन गर्ने निर्णय गरेका छन्। छानबिनमा रहेका अन्य फाइलहरु पनि खोल्ने उनले बताए।
केन्द्रीय अनुसन्धान ब्युरो (सिआईबी) लाई बलियो बनाउने र अनुसन्धान प्रक्रिया टुंगो लगाउने विषयमा पनि गुरुङले जोड दिए। पदभार सम्हाल्दै उनले आफूमाथि जस्तोसुकै आरोप सहने तर नेपाली चेलीहरूलाई दुःख दिएको सहन नसक्ने बताए। तथ्यबिनाका आरोप लगाइएको भन्दै उनले मिडिया ट्रायलले कसैलाई आत्महत्यासम्म पुर्याउन नहुने धारणा राखे।
