दूध विकास संस्थान (डीडीसी) को लैनचौरस्थित केन्द्रीय कार्यालयमा प्रहरीको केन्द्रीय अनुसन्धान ब्यूरो (सीआईबी) ले छापा मारेको छ। ब्यूरोले दूध खरिदबिक्री सम्बन्धी कागजात, पाँच कर्मचारीका मोबाइल र पछिल्लो तीन वर्षका निर्णयसम्बन्धी कागजात नियन्त्रणमा लिएको छ।
सीआईबीका एसएसपी शिवकुमार श्रेष्ठले अनुसन्धानका लागि आवश्यक कागजात नियन्त्रणमा लिएको बताए। स्रोतका अनुसार, किसानको ठूलो रकम भुक्तानी रोकिनु र संस्थानभित्रको सम्भावित अनियमितता तथा ठगीबारे प्रहरीले अनुसन्धान गरिरहेको छ।
डीडीसीले किसानबाट सङ्कलन गरेको दूध बजारमा बिक्री गर्दै आएको छ। पछिल्लो चार महिनाको बक्यौता ५८ करोड रुपैयाँ पुगेको छ। यसमध्ये १२ करोड रुपैयाँ मात्र भुक्तानी भएको डीडीसीका अधिकारीहरूले दाबी गरेका छन्।
प्रधानमन्त्रीले ‘याक चिज’ खाएको तस्बिर सार्वजनिक भएपछि डीडीसी चर्चामा आएको थियो। अहिले भने संस्थानमाथि लागेको अनियमितताको आरोप र किसानको भुक्तानी रोकिएको विषयले नयाँ तरंग ल्याएको छ।
