पूर्वी नाका काँकडभिट्टाबाट गत आर्थिक वर्ष २०८२/८३ मा २४ अर्ब २६ करोड ७४ लाख रुपैयाँको कृषिजन्य वस्तु आयात भएको छ। प्लान्ट क्वारेन्टाइन कार्यालय काँकरभिट्टाका प्रमुख नन्दकिशोर सिंहका अनुसार भारत, चीन, अष्ट्रेलिया र बङ्गलादेशबाट खाद्यान्न, दलहन, तरकारी र फलफूल नेपाल भित्रिएको हो।
आयातित कृषि उपजमध्ये खाद्यान्न र दलहनको हिस्सा सबैभन्दा ठूलो छ। भारतबाट मात्र चामल र कोदो २१ करोड २३ लाख १३ हजार रुपैयाँ बराबरको आयात भएको छ।
यस्तै, अष्ट्रेलिया र भारतबाट १८ करोड २७ लाख ९९ हजार मूल्यको एक हजार ९९६ मेट्रिकटन चना आयात भएको छ। १० करोड ८८ लाख ५४ हजार बराबरको ७९६ मेट्रिकटन मासको दाल पनि अष्ट्रेलियाबाट भित्रिएको छ।
ताजा तरकारीतर्फ भारतबाट उल्लेख्य आयात भएको छ। गोलभेडा १४ करोड ३९ लाख ६६ हजार, काँक्रा सात करोड ९० लाख ६४ हजार र खुर्सानी तीन करोड २४ लाख ३५ हजार रुपैयाँको आयात भएको छ।
फलफूलमा भारत र चीनबाट स्याउ, भुइँकटर, तरबुजा र नासपाती मुख्य छन्। भारत र चीनबाट २९ करोड ५९ लाख ७२ हजारको स्याउ आयात भएको छ। भारतबाट १४ करोड २४ लाख ८१ हजारको तरबुजा भित्रिएको छ।
