दक्षिण कोरिया जान भाषा र सीप परीक्षा उत्तीर्ण गरेका युवाहरूले काठमाडौंको माइतीघरमा प्रदर्शन गरेका छन्। सोमबार सडकमा उत्रिएका उनीहरूले सरकारसँग न्यायको माग गरेका हुन्।
भाषा परीक्षा उत्तीर्ण गरेर रोस्टरमा सूचीकृत भएका युवाहरूको नाम दुई वर्षपछि स्वतः हट्ने प्रावधान छ। यसले गर्दा उनीहरू कोरिया जान पाएका छैनन्। उनीहरूको भविष्य अन्योलमा परेको छ।
प्रदर्शनकारी युवाहरूले भाषा परीक्षा उत्तीर्ण भएको दुई वर्षको म्याद थप गर्न माग गरेका छन्। उत्तीर्ण भएकाहरूको फाइल पुनः रोजगारदातासम्म पुर्याउनुपर्ने उनीहरूको अर्को माग छ। कोरिया नलाने यो प्रणाली खारेज गर्नुपर्ने नारा पनि उनीहरूले लगाए।
‘सबै कुरामा सक्षम भएर पनि कोरिया नलाने सिस्टम खारेज गर’, ‘हामीलाई आश्वासन होइन नतिजा दे’, ‘भ्रष्टाचारीलाई संरक्षण गर्ने श्रममन्त्री राजीनामा दे’, ‘रास्वपा सरकार पीडितलाई न्याय देऊ’ जस्ता नारा लेखिएका प्लेकार्ड प्रदर्शनकारीले बोकेका थिए।
परीक्षा उत्तीर्ण गरेर पनि अवसर नपाउँदा युवाहरूमा निराशा छाएको छ। उनीहरूले आफ्नो लगानी र समय खेर गएको महसुस गरेका छन्।
