अर्थमन्त्री स्वर्णिम वाग्लेको भारत भ्रमणका क्रममा कूटनीतिक मर्यादाको धज्जी उडाइएको छ। राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले भारतीय समकक्षीसँगको द्विपक्षीय भेटवार्तामा नेपालको राष्ट्रिय झण्डा नराखिएकोमा आपत्ति जनाएका हुन्।
बिहीबार साँझ सामाजिक सञ्जालमार्फत शाहीले अर्थमन्त्रीको भ्रमण व्यक्तिगत हो वा पदीय हैसियतको, भन्दै स्पष्ट पार्न माग गरे। उनले प्रश्न गरे, ‘अर्थमन्त्रीज्यू, तपाईं व्यक्तिगत रूपमा घुम्न जानुभएको हो कि नेपालको अर्थमन्त्रीको हैसियतमा?’
विदेश भ्रमणका निश्चित विधि, नीति र कूटनीतिक मर्यादा हुने स्मरण गराउँदै शाहीले नयाँ दिल्लीस्थित नेपाली दूतावासको भूमिकामाथि पनि असन्तुष्टि व्यक्त गरे। दिल्लीमा नेपालको आफ्नै राजदूतावास रहँदा समेत मन्त्रीस्तरीय बैठकमा राष्ट्रिय झण्डा नराख्नुको कारण अर्थमन्त्री वाग्लेले जवाफ दिनुपर्ने शाहीको माग छ।
