प्रधानमन्त्री दैवी प्रकोप उद्धार कोषबाट बाढी प्रभावित क्षेत्रमा तत्काल एक अर्ब रुपैयाँ परिचालन गरिनेछ। मंगलबार बसेको कोष सञ्चालन समितिको बैठकले यो निर्णय गरेको हो।
राष्ट्रिय योजना आयोगका उपाध्यक्ष डा. गुणकर भट्टले गृहसचिवको नेतृत्वमा विपद् व्यवस्थापन कोषमा रकम निकासा गरिने बताए। विपद् जोखिम न्यूनीकरण तथा व्यवस्थापन ऐन, २०७४ को दफा २२ अनुसार गृहसचिवले कोषको व्यवस्थापन गर्छन्।
एभरेस्ट बैंकमा रहेको कोषको खाताबाट एक अर्ब रुपैयाँ पठाइएको हो। उक्त रकम बाढीग्रस्त क्षेत्रमा उद्धार, राहत, तत्कालीन पूर्वाधार सुधार र अस्थायी वासस्थान निर्माणमा खर्च गरिनेछ।
बाढीग्रस्त पालिका वा जिल्लाका विपद् व्यवस्थापन समितिले आवश्यकता अनुसार रकम माग गर्नेछन्। गृहसचिव नेतृत्वको समितिले मागका आधारमा रकम वितरण गर्नेछ।
यसैबीच, रसुवा र नुवाकोट बाढीपीडितलाई नेपालगन्ज उद्योग वाणिज्य सङ्घले पाँच लाख ६० हजार रुपैयाँ सहयोग गर्ने भएको छ। सङ्घका अध्यक्ष चिरन्जीवी ओलीले रकम प्रधानमन्त्री दैवी प्रकोप उद्धार कोषमा पठाइने बताए।
चीनले पनि बाढीपीडितका लागि दोस्रो खेप राहत सामग्री पठाएको छ। चिनियाँ जनमुक्ति सेनाको विमानमार्फत ड्रोन, डीएनए परीक्षण उपकरण र पानी शुद्धीकरण सामग्री काठमाडौं आइपुगेको छ। त्रिभुवन अन्तरराष्ट्रिय विमानस्थलमा मन्त्री महावीर पुनलाई चिनियाँ राजदूत झाङ माओमिङले सामग्री हस्तान्तरण गरे।
