इजरायल, अमेरिका र अजरबैजान पठाइदिन्छु भन्दै लाखौँ ठगी गर्ने तीन जनालाई प्रहरीले पक्राउ गरेको छ। उनीहरूले पीडितहरूबाट कुल ३० लाख ४६ हजार रुपैयाँ असुलेको पाइएको छ।
पक्राउ पर्नेहरूमा सिराहा घर भई ललितपुर महानगरपालिका–१ बस्ने ४३ वर्षीय हर्षनारायण चौधरी, म्याग्दी घर भई काठमाडौँ महानगरपालिका–३२ बस्ने ४१ वर्षीय पदमबहादुर खड्का क्षेत्री र सप्तरी घर भई कागेश्वरी मनोहरा नगरपालिका–४ बस्ने ४८ वर्षीय शिवनारायण चौधरी छन्।
हर्षनारायणले इजरायल पठाइदिने भन्दै एक पीडितबाट ५ लाख रुपैयाँ लिएका थिए। पदमबहादुरले अमेरिका पठाइदिने प्रलोभन देखाएर अर्का एक पीडितबाट ३ लाख १० हजार रुपैयाँ ठगे। शिवनारायणले अजरबैजान पठाइदिने भन्दै ६ जनाबाट २२ लाख ४६ हजार रुपैयाँ लिएर सम्पर्कविहीन भएको पीडितहरूको उजुरीमा उल्लेख छ।
पीडितहरूको उजुरीपछि काठमाडौँ उपत्यका अपराध अनुसन्धान कार्यालय, टेकुबाट खटिएको प्रहरी टोलीले उनीहरूलाई काठमाडौँका विभिन्न स्थानबाट पक्राउ गरेको हो।
उनीहरूलाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल पठाइएको छ।
