गण्डकी र लुम्बिनी प्रदेशका एक-दुई स्थानमा आज राति ‘अति भारी’ वर्षा हुने मौसम पूर्वानुमान महाशाखाले चेतावनी दिएको छ। महाशाखाले सम्भावित विपद्को तत्काल प्रतिकार्य गर्न उच्च सतर्कता अपनाउन आग्रह गरेको छ।
शनिवार राति गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा भारीदेखि धेरै भारी वर्षाको सम्भावना छ। मधेश र बागमती प्रदेशका एक-दुई स्थानमा समेत भारी वर्षाको सम्भावना छ।
वर्षासँगै देशका अधिकांश भू-भागमा तीव्र हावाहुरी चल्नेछ। मधेश, बागमती, गण्डकी, लुम्बिनी र सुदूरपश्चिम प्रदेशको तराई भू-भागमा हावाहुरीको उच्च जोखिम छ। गण्डकी, लुम्बिनी, कर्णाली र सुदूरपश्चिम प्रदेशका पहाडी भू-भागका केही स्थानमा समेत हावाहुरी चल्ने पूर्वानुमान छ।
गण्डकी र लुम्बिनीका धेरैजसो भू-भाग रातो संकेत (प्रतिकार्य गर्ने) मा छन्। सुदूरपश्चिम, कर्णाली र बागमतीका भू-भाग सुन्तला रङ (सतर्क रहने) मा वर्गीकरण गरिएको छ।
अति भारी वर्षा र हावाहुरीले बाढी, पहिरो तथा डुबानको जोखिम बढाउँछ। नदी तटीय क्षेत्र तथा भिरालो जमिन आसपासका बासिन्दालाई महाशाखाले विशेष सतर्कता अपनाउन अनुरोध गरेको छ।
