भारी वर्षाले २१ को मृत्यु, पाँच बेपत्ता, पाँच घाइते। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीले चार, पहिरोले १४ र अविरल वर्षाले तीनको ज्यान लिएको छ।
प्राधिकरणका अनुसार पहिरोका २५६ घटनामा १४ जनाको मृत्यु, चार घाइते र पाँच बेपत्ता भएका छन्। बाढीका ५३ घटनामा चारको मृत्यु भएको छ। अविरल वर्षाका ११७ घटनामा तीनको मृत्यु र एक घाइते भएको Nmkhabarलाई स्रोतले पुष्टि गर्यो।
असोज ८ देखि ११ गतेसम्मको वर्षाले देशभर १४३ घर पूर्ण र ५१ घर आंशिक क्षतिग्रस्त बनाएको छ। विपद्ले ७४७ परिवार प्रभावित भएका छन्। जोखिममा परेका दुई हजार जनालाई सुरक्षित स्थानमा सारिएको छ।
नवलपरासी (बर्दघाट सुस्तापूर्व)को डेढगाउँमा ५४४.२ मिमी वर्षा मापन गरियो। कास्कीको पञ्चासेमा ५००.२ र तनहुँको अत्रौलीटारमा ४७२ मिमी वर्षा भएको छ।
वर्षाका समयमा नौ हजार पर्यटक तथा पदयात्री यात्रारत थिए। जाजरकोट, म्याग्दी, बागलुङलगायत जिल्लामा हेलिकोप्टरमार्फत उद्धार गरिएको छ।
बाढी पूर्वानुमान महाशाखाले आठ लाख १४ हजार एसएमएस पठायो। पर्यटकलाई अङ्ग्रेजीमा समेत सतर्कता सूचना जारी गरियो।
केन्द्रीय मनसुन प्रतिकार्य कमाण्ड पोष्टले दैनिक बैठक गर्यो। जोखिम देखिएका जिल्लामा सवारी आवागमन रोकियो। प्रभावित जिल्लामा विद्यालय बिदा दिइएको छ।
म्याग्दीमा पहिरोले ६ को मृत्यु, तीन बेपत्ता भएका छन्। देशैभरका राजमार्ग तथा सडक खण्डहरू अवरुद्ध भएका छन्।
