भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयले सोमबार सूचना जारी गरी निजामती कर्मचारी अस्पतालको सेवा प्रदेशस्तरमा विस्तार गरेको छ। यसअनुसार, सोमबार (जेठ २५) देखि निजामती कर्मचारी अस्पताल काठमाडौँले प्रदान गर्ने छुट तथा सहुलियतसहितको स्वास्थ्य उपचार सेवा प्रारम्भिक चरणमा भरतपुर अस्पताल, चितवन र नारायणी अस्पताल, वीरगञ्जबाट उपलब्ध हुनेछ।
यो सेवा निजामती कर्मचारी अस्पतालबाट परिचयपत्र प्राप्त गरेका बहालवाला तथा अवकाशप्राप्त निजामती कर्मचारी र उनीहरूका आश्रित परिवारले प्राप्त गर्न सक्नेछन्। सेवा लिन जाँदा सम्बन्धित कर्मचारीले अस्पतालबाट जारी भएको आधिकारिक परिचयपत्र अनिवार्य रूपमा साथमा लैजानुपर्नेछ।
निजामती कर्मचारी, अवकाश प्राप्त कर्मचारी तथा आश्रित परिवारलाई गुणस्तरीय स्वास्थ्य सेवा सहज, सुलभ र पहुँचयोग्य बनाउने उद्देश्यले यो सेवा विस्तार गरिएको हो। मन्त्रालयका अनुसार बाँकी प्रदेशहरूमा समेत सेवा विस्तारको तयारी भइरहेको छ।
स्वास्थ्य तथा जनसङ्ख्या मन्त्रालयसँगको समन्वयमा सेवा प्रदायक अस्पतालहरूको सूचीकरण सम्पन्न भइसकेको छ। आवश्यक तयारी पूरा गरी क्रमशः सबै प्रदेशमा यो सेवा विस्तार गरिने मन्त्रालयले जनाएको छ। यस व्यवस्थाबाट काठमाडौँ उपत्यकाबाहिर कार्यरत तथा बसोबास गर्ने निजामती कर्मचारी, अवकाशप्राप्त कर्मचारी र आश्रित परिवारले आफ्नै प्रदेशमा सहज रूपमा स्वास्थ्य सेवा प्राप्त गर्नेछन्।
