चालु आर्थिक वर्ष २०८३/८४ को पहिलो महिना साउन मसान्तसम्ममा सरकारको कुल राजस्व संकलन लक्ष्यको ५.८४ प्रतिशत पुगेको छ। यस अवधिमा पुँजीगत खर्च भने १ प्रतिशतको हाराहारीमा मात्र भएको छ।
महालेखा नियन्त्रक कार्यालयले सार्वजनिक गरेको विवरण अनुसार, सरकारले चालु आर्थिक वर्षका लागि १५ खर्ब ८० अर्ब ३१ करोड रुपैयाँ राजस्व संकलन गर्ने लक्ष्य लिएकोमा साउन मसान्तसम्म ९२ अर्ब २२ करोड रुपैयाँ संकलन गरेको छ। यसमध्ये कर राजस्व ८५ अर्ब १९ करोड (६.०७%) र गैर-कर राजस्व ७ अर्ब ३ करोड (३.९७%) रहेको छ।
यसैबीच, साताको पहिलो दिन नेपाल स्टक एक्सचेञ्ज (नेप्से) मा सेयर कारोबारमा २०१ वटा कम्पनीको सेयर मूल्य घटेको छ। ७२ कम्पनीको सेयर मूल्य बढ्दा ५ कम्पनीको स्थिर रह्यो। आज नेप्सेमा ५ अर्ब ५२ करोड रुपैयाँभन्दा बढीको कारोबार भयो र नेप्से परिसूचक २.०१ अंकले घट्यो। सर्वोत्तम पेन्ट्स उद्योगको सेयर कारोबारले सबैभन्दा धेरै आर्जन गर्यो भने फस्र्ट माइक्रोफाइनान्सको सेयर कारोबार गर्नेले सबैभन्दा धेरै गुमाए।
साउन महिनामा ३ अर्ब ७७ करोड रुपैयाँ बराबरको वैदेशिक लगानी स्वीकृत भएको छ भने १८८ साना उद्योगहरूमा लगानी आकर्षण भएको छ।
अर्कोतर्फ, नेपाल विद्युत् प्राधिकरणको आम्दानी बढे पनि नाफामा कमी आएको छ। गत आर्थिक वर्ष २०८२/८३ मा प्राधिकरणको करअघिको नाफा ५ अर्ब ४ करोड रुपैयाँ रहेको छ, जुन अघिल्लो आर्थिक वर्षको तुलनामा ४३% अर्थात् ३ अर्ब ८७ करोडले कमी हो। प्राधिकरणले विद्युत् बिक्री र अन्य आम्दानीबाट १ खर्ब ६६ अर्ब रुपैयाँ कुल आम्दानी गरेको छ। विदेशी विनिमय दर वृद्धिका कारण प्राधिकरणले व्यहोर्नुपर्ने दायित्व २७२.८६% ले वृद्धि भई ११ अर्ब ५१ करोड पुगेको छ।
आर्थिक वर्ष २०८२/८३ को अन्त्यसम्ममा नेपालको कुल जडित् विद्युत उत्पादन क्षमता ४ हजार १ सय २० मेगावाट पुगेको छ। प्राधिकरणका विद्युत ग्राहकको संख्या ५९ लाख २७ हजार पुगेको छ। गत आर्थिक वर्षमा नेपालले १० अर्ब ५६ करोड विद्युत् आयातमा खर्च गर्यो भने २९ अर्ब ३१ करोडको विद्युत् निर्यात गर्यो।
