बिहानको छाक टार्नसमेत धौधौ हुने टेकबहादुर सार्कीको परिवारले अब भूकम्प प्रतिरोधी दुईकोठे घरमा रात बिताउनेछ। हलेसी तुवाचुङ नगरपालिकाले घरबारविहीन सार्की परिवारलाई जस्तापाताको छानासहितको नयाँ घर निर्माण गरी हस्तान्तरण गरेको छ। यो सुरक्षित नागरिक आवास कार्यक्रम अन्तर्गतको पहिलो चरण हो।
नगरपालिकाले तीन विपन्न परिवारका लागि भूकम्प प्रतिरोधी घर निर्माण सम्पन्न गरेको छ। अर्खौलेका टेकबहादुर सार्की, मङ्गलटारका भया दमाईँ र डिकुवाका देशवीर राईका लागि घर तयार भएका हुन्। नगरप्रमुख विमला राईले बाँकी दुई परिवारलाई चाँडै घर हस्तान्तरण गरिने बताइन्।
फिरन्ते जीवन बिताइरहेका सार्की परिवार भूकम्प प्रतिरोधी घर पाएपछि हर्षित भएका छन्। नगरपालिकाको १३६औँ कार्यपालिका बैठकले विपन्न तीन परिवारलाई घर निर्माण गर्ने निर्णय गरेको थियो।
नगर प्रवक्ता एवं वडाध्यक्ष कमल गिरीका अनुसार, तीन परिवारका लागि प्रति घर पाँच लाख रुपैयाँ लगानी गरिएको छ। अर्खौलेका टेकबहादुर, मङ्गलटारका भया दमाईँ र डिकुवाका देशवीर राईले यो लाभ पाएका छन्।
करिब १२ वर्ष गाउँ बाहिर बिताएका सार्की परिवार गत भदौमा गाउँ फर्किएका थिए। दैनिक ज्याला मजदुरी गर्ने टेकबहादुरकी श्रीमती र १० वर्षीय छोरा छन्।
यसैगरी, हलेसी तुवाचुङ नगरपालिकाले काठमाडौँ र तराईबाट घरटहरा भत्काइएपछि विस्थापित भएका नगरवासीलाई पनि घर निर्माण गरिदिने भएको छ। पुनःस्थापनाका लागि निवेदन दिएका तीन परिवारलाई नगरपालिकाले घर बनाइदिने भएको हो।
नगरप्रमुख राईले विस्थापित परिवार नगरपालिका फर्किएर स्थायी बसोबास गर्न चाहेमा पाँच लाख रुपैयाँ लगानीमा भूकम्प प्रतिरोधी घर निर्माण गरिने बताइन्। यस्तो सुविधा लिन चाहने परिवारका नाममा जग्गा हुनुपर्नेछ।
