जल तथा मौसम विज्ञान विभागले आगामी तीन दिन लुम्बिनी र सुदूरपश्चिम प्रदेशका केही स्थानमा अधिकतम तापक्रम ४० डिग्री सेल्सियस नाघ्ने विशेष बुलेटिन जारी गरेको छ। विभागले तातो हावा तथा तातो लहर (लु) बाट बच्न आवश्यक सावधानी अपनाउन सार्वजनिक अनुरोध गरेको हो।
मौसमविद् सञ्जिव अधिकारीका अनुसार लुम्बिनी र सुदूरपश्चिमका तराई भू-भागमा मध्यम तातो लहर आउनेछ। पहाडी भू-भागमा तातो दिनको सम्भावना छ। यही जेठ ६ गतेदेखि नै यी क्षेत्रमा ४० डिग्री सेल्सियसभन्दा बढी तापक्रम मापन गरिएको छ। केही स्थानमा ३८ डिग्री सेल्सियसभन्दा माथि तापक्रम पुगेको छ।
विभागले कञ्चनपुर, कैलाली, डोटी, बर्दिया, बाँके र दाङ जिल्लामा सतर्कता अपनाउन भनेको छ। बैतडी, डडेलधुरा, अछाम, सुर्खेत, सल्यान, रोल्पा, प्युठान, पाल्पा, अर्घाखाँची, रुपन्देही र कपिलवस्तुलाई अद्यावधिक रहन निर्देशन दिएको छ।
तातो हावा तथा लहरले थकाइ, कमजोरी, तिर्खा, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशी दुख्ने र बान्ता हुनेजस्ता असर गर्न सक्ने विभागले जनाएको छ।
गर्मीबाट बच्न घरभित्र वा चिसो स्थानमा बस्न, चर्को घाममा ननिस्कन, हल्का सुतीका कपडा लगाउन र टाउको छोप्न सुझाव दिइएको छ। नियमित पानी तथा झोल पदार्थ पिउन र स्वास्थ्य समस्या भए स्वास्थ्यकर्मीको सल्लाह लिन अनुरोध गरिएको छ।
