इलाम जिल्ला प्रशासन कार्यालयले भारी वर्षाको पूर्वानुमानका कारण राति सवारी आवागमनमा रोक लगाएको छ। असोज ८ देखि ११ गतेसम्म हरेक दिन बेलुकी ७ बजेदेखि बिहान ५ बजेसम्म सवारी साधन सञ्चालन बन्द रहनेछ। प्रमुख जिल्ला अधिकारी लक्ष्मण ढकालले जारी गरेको सूचना अनुसार, गत वर्षको वर्षाले मेची राजमार्गसहित जिल्लाका सडक जीर्ण भएकाले यो निर्णय गरिएको हो।
यस्तै, काभ्रेपलाञ्चोकमा पनि असोज ८ देखि ११ गतेसम्म बीपी राजमार्गको काभ्रे खण्डमा साँझ ५ बजेदेखि बिहान ५ बजेसम्म सवारी रोकिनेछ। मनसुन प्रतिकार्य कमाण्डपोष्ट काभ्रेपलाञ्चोकले सम्भावित बाढीपहिरोको जोखिमलाई मध्यनजर गरी यो कदम चालेको हो। प्रमुख जिल्ला अधिकारी गोपालकुमार अधिकारीले विगतको क्षति र आगामी जोखिमलाई ध्यानमा राखेको बताए।
मकवानपुरको कुलेखानी जलाशयमा पनि भारी वर्षाको सम्भावनाले निगरानी बढाइएको छ। जिल्ला प्रशासन कार्यालय मकवानपुरले जलाशय र राष्ट्रिय राजमार्ग क्षेत्रमा उच्च सतर्कता अपनाउन आग्रह गरेको छ। गत वर्ष असोज १२ गते जलाशय भरिएर बाँध खोल्दा सिस्नेरीको सडक र ४९ घर बगाएको थियो। यसपटक पानीको सतह र निकासको वैज्ञानिक व्यवस्थापन गर्न निर्देशन दिइएको छ।
पृथ्वी राजमार्ग, कान्ति राजपथ, मदन भण्डारी लोकमार्ग, त्रिभुवन राजपथ र हेटौँडा–काठमाडौं कुलेखानी मार्गमा विशेष निगरानी बढाइएको छ। सम्भावित विपद्का लागि नेपाली सेना, प्रहरी र सशस्त्र प्रहरीलाई तयारी अवस्थामा राखिएको छ।
