पाँचथर र सङ्खुवासभामा मध्यपहाडी लोकमार्ग र कोशी राजमार्ग वर्षायाम सुरु नहुँदै पहिरो र बाढीले पूर्ण रूपमा ठप्प पारेको छ। जेठ ८ गते पाँचथरको याङवरक गाउँपालिका-३ ओयाम बजार र रिजालभिरमा पहिरो तथा वडा नम्बर २ दोभानमा बाढीले मध्यपहाडी लोकमार्ग अवरुद्ध गरेको छ। जेठ ११ गते सङ्खुवासभाको भोटखोला गाउँपालिका-४ सिम्बुङमा पहिरोले कोशी राजमार्ग ठप्प पारेको छ।
कोशी प्रदेशकै भोजपुर नगरपालिका-५ बोखिममा बाढीले अवरुद्ध मध्यपहाडी लोकमार्ग र सङ्खुवासभाको मकालु गाउँपालिका-३ नयाँ बस्तीमा पहिरोले अवरुद्ध कोशी राजमार्ग भने एकतर्फी सुचारु भएका छन्। भोजपुरमा वैकल्पिक सडकको व्यवस्था छ।
बागमती प्रदेशको काभ्रेपलाञ्चोकमा बीपी राजमार्गको खुर्कोट-नेपालथोक-कटुञ्जेबेँसी सडक खण्डमा वैशाख २२ गतेदेखि सम्भावित बाढीको जोखिमले सवारी साधन सञ्चालनमा पूर्ण रोक लगाइएको छ।
गण्डकी प्रदेशको म्याग्दीमा अन्नपूर्ण गाउँपालिका-३ जलथले र रघुगंगा गाउँपालिका-३ तल्लो बैसरीमा गएको पहिरोले बेनी-जोमसोम सडक खण्ड एकतर्फी सञ्चालनमा छ।
कर्णाली प्रदेशको हुम्ला जिल्लामा नाम्खा गाउँपालिका-२ स्थित हिल्सा-सिमिकोट सडक खण्डमा वैशाख २९ गतेदेखि सम्भावित पहिरोको जोखिमले यातायात बन्द गरिएको छ।
सडक अवरोधसम्बन्धी थप सूचना नेपाल प्रहरीको आधिकारिक वेबसाइटमा उपलब्ध हुनेछ।
