नेपाल राष्ट्र बैंकले ‘एकीकृत निर्देशन, २०८१’ का आधा दर्जनभन्दा बढी व्यवस्था उल्लंघन गरेको भन्दै हिमालयन बैंकलाई कारबाही गरेको छ।
राष्ट्र बैंकको स्थलगत निरीक्षणमा बैंकले सीमित ऋणीलाई ब्याकडेटबाट प्रिमियम छुट दिएको पाइएको छ। सो छुट रकम बक्यौता ब्याज र साँवा भुक्तानीमा प्रयोग भएको थियो।
बैंकले समयसीमा नाघेका कर्जाको १० प्रतिशत ब्याज मात्र लिएर पुनरतालिकीकरण वा पुनर्संरचना गरेको राष्ट्र बैंकको अध्ययनले देखाएको छ।
यस्तै, बैंकले ९० दिनभन्दा बढी बक्यौता रहेका फोर्स लोनलाई खराब कर्जामा वर्गीकरण गरेन। यस्तो कर्जामा पर्याप्त कर्जा नोक्सानी व्यवस्था पनि कायम गरेको थिएन।
यी उल्लंघनका कारण राष्ट्र बैंकले ‘राष्ट्र बैंक ऐन, २०५८ (दोस्रो संशोधन २०७३ सहित)’ को दफा १०० को उपदफा (क) बमोजिम कारबाही गर्यो। बैंकको सञ्चालक समिति र प्रमुख कार्यकारी अधिकृत (सिइओ) लाई सचेत गराइएको छ।
राष्ट्र बैंक ऐन, २०५८ को दफा १०० को उपदफा १ (ख) अनुसार हिमालयन बैंक लिमिटेडको सञ्चालक समितिबाट सुधारात्मक कदम चाल्न कबुलियतनामा गराइएको छ।
