गृहमन्त्री सुदन गुरुङले संवेदनशील सूचना चुहावट गर्नेमाथि कारबाही गर्ने चेतावनी दिएका छन्।
गुरुङले २०८३ असोज २० गते मंगलबार सामाजिक सञ्जाल फेसबुकमार्फत यस्तो जानकारी गराएका हुन्। उनले गृह मन्त्रालय र मातहतका निकायका अधिकारी तथा कर्मचारीहरूले पदीय जिम्मेवारी बिर्सेर गोप्य सूचना चुहाउने प्रवृत्ति लामो समयदेखि नियालिरहेको बताए।
राज्यले सुम्पेको गोपनीयता भङ्ग गरी देश वा संस्थालाई जानाजानी धोका दिने जो-कोहीलाई उन्मुक्ति नदिइने र न्यायको कठघरामा ल्याइने गृहमन्त्री गुरुङले स्पष्ट पारेका छन्। यो चेतावनी सशस्त्र प्रहरी बलका एआईजी वंशीराज दाहाललाई २०८३ असोज १९ गते सोमबार निलम्बन गरिएलगत्तै आएको हो।
गृह मन्त्रालयले दाहालमाथि सुरक्षासँग सम्बन्धित संवेदनशील सूचना चुहावट गरेको र पदीय आचरणविपरीत कार्य गरेको आरोप लगाएको छ। दाहालमाथि पूर्वप्रधानन्यायाधीश चोलेन्द्रशमशेर राणा पक्राउ परेपछि टेकुस्थित प्रहरी कार्यालयमा गएर ‘चेन अफ कमाण्ड’ मिचेको र झापाका एक व्यक्तिको मोबाइलबाट सूचना ‘लिक’ गरेको आरोप छ।
गुरुङले फेसबुकमा लेखे, ‘संवेदनशील राज्य सूचना कसैको निजी सम्पत्ति होइन; यो सार्वजनिक जिम्मेवारी हो। पदमा रहँदा सूचनामा पहुँच मिल्छ, तर त्यसको दुरुपयोग गर्ने अधिकार मिल्दैन।’ उनले सानो सूचनाले पनि अपराध रोक्न, अनुसन्धान अगाडि बढाउन वा गम्भीर घटनाको सत्य स्थापित गर्न निर्णायक भूमिका खेल्न सक्ने उल्लेख गरे।
गृह मन्त्रालयले एआईजी दाहालमाथि लागेको अभियोगमाथि जाँचबुझ गर्न एक अधिकृत तोकेको छ। जाँचबुझ अधिकृतलाई तीन दिनभित्र अनुसन्धान सम्पन्न गरी प्रतिवेदन पेस गर्न निर्देशन दिइएको छ। चुहावट भएको भनिएको संवेदनशील सूचनाको विस्तृत विवरण भने अझै सार्वजनिक भएको छैन। छानबिनबाट प्राप्त निष्कर्षका आधारमा थप कानुनी प्रक्रिया अघि बढाइने मन्त्रालयले जनाएको छ।
यसअघि: गृहमन्त्री सुधन गुरुङको चेतावनी: संवेदनशील सूचना चुहाउनेलाई कानूनी दायरामा ल्याइने
