मुख्य सामग्रीमा जानुहोस्
Nmkhabar
EN
एनपीएल लाइभ स्कोर, अंक तालिका र तालिका अंक तालिका ›

स्थानीयलाई जलविद्युत सेयर अंकित मूल्यमै दिन इप्पानको माग

स्वतन्त्र ऊर्जा उत्पादकहरूको संस्था (इप्पान) ले जलविद्युत आयोजनाबाट प्रत्यक्ष प्रभावित स्थानीयलाई सेयर अंकित मूल्यमै दिनुपर्ने माग गरेको छ। केही कम्पनीले प्रिमियम मूल्यमा सेयर जारी गर्नेबारे छलफल गरिरहेको विषयमा इप्पानले ध्यानाकर्षण गराएको छ। यसले स्थानीयको पहुँच सीमित हुने र आयोजना-समुदाय सम्बन्धमा नकारात्मक असर पर्ने भन्दै इप्पानले अंकित मूल्यमै दिन आग्रह गरेको छ।
Nmkhabar डेस्क
१ मिनेट पढाइ
आकार:
जलविद्युत सेयर
Share:
१८४

स्वतन्त्र ऊर्जा उत्पादकहरूको संस्था, नेपाल (इप्पान) ले जलविद्युत आयोजनाबाट प्रत्यक्ष प्रभावित स्थानीयवासीलाई निष्कासन गरिने सेयर अंकित मूल्य अर्थात् प्रति कित्ता एक सय रुपैयाँमै उपलब्ध गराउनुपर्ने माग गरेको छ ।

आइतबार एक प्रेस विज्ञप्ति जारी गर्दै इप्पानले केही प्रवर्द्धक कम्पनीहरूले स्थानीय प्रभावितका लागि प्रिमियम मूल्यमा सेयर निष्कासन गर्ने विकल्पबारे छलफल गरिरहेको विषयप्रति गम्भीर ध्यानाकर्षण भएको जनाएको छ ।

धितोपत्र दर्ता तथा निष्कासन नियमावली, २०७३ को नियम ९ (४) अनुसार स्थानीयलाई लाभान्वित गराउने उद्देश्यले १० प्रतिशत सेयर दिने कानुनी प्रबन्ध रहेको स्मरण गराउँदै इप्पानले सोही अनुसार अंकित मूल्यमै सेयर दिन सम्पूर्ण सदस्यहरूलाई अनुरोध गरेको छ ।

विज्ञापन

इप्पानका अनुसार जलविद्युत आयोजना निर्माणका क्रममा जग्गा उपलब्ध गराउने, वातावरणीय तथा सामाजिक प्रभाव सहने र निर्माण अवधिभरका असुविधा व्यहोर्ने स्थानीय समुदायलाई आयोजनाको वास्तविक साझेदार बनाउनु आवश्यक छ ।

यदि स्थानीयलाई प्रिमियम मूल्यमा सेयर निष्कासन गरिएमा उनीहरूको पहुँच सीमित हुने, अपनत्वको भावना कमजोर हुने र आयोजना र समुदायबीचको विश्वासको सम्बन्धमा नकारात्मक असर पर्ने ठहर इप्पानले गरेको छ । अंकित मूल्यमा सेयर उपलब्ध गराउँदा स्थानीय स्तरमा सहयोग र सहकार्य सुदृढ हुने, सामाजिक विवाद र अवरोधहरू न्यून हुने तथा आयोजनाहरू समयमै सम्पन्न गर्न सहज वातावरण निर्माण हुने विश्वास विज्ञप्तिमा व्यक्त गरिएको छ ।

इप्पानले नेपाल सरकार र सम्बन्धित नियामक निकायहरूलाई स्थानीय प्रभावितको हित र आयोजनाको दीर्घकालीन स्थायित्वका लागि अंकित मूल्यमा सेयर उपलब्ध गराउने नीतिलाई निरन्तरता दिन आग्रह गरेको छ ।

साथै, साधारण सेयर निष्कासन प्रक्रिया लामो समयदेखि प्रभावित हुँदा प्रवर्द्धकहरूले समस्या भोगिरहेको तर्फ ध्यानाकर्षण गराउँदै इप्पानले यस प्रक्रियालाई सरल, पारदर्शी र समयबद्ध बनाउन माग गरेको छ ।

इप्पानका अध्यक्ष मोहनकुमार डाँगीले सेयर निष्कासनमा भइरहेको ढिलाइ समाधानका लागि समयमै सेयर निष्कासन गर्ने परिपाटी विकास गर्न सरकार र सरोकारवाला निकायहरूसँग विशेष आग्रह गरेका छन् ।

विज्ञापन
Nmkhabar डेस्क

Nmkhabar डेस्क

संवाददाता · Nmkhabar

Nmkhabar डेस्क Nmkhabar को सम्पादकीय डेस्क हो। यस नाममा प्रकाशित समाचार सरकारी निकाय, अदालत, संसद, नेपाल राष्ट्र बैंक तथा अन्तर्राष्ट्रिय संस्थाका आधिकारिक स्रोत र विश्वसनीय सूचनाका आधारमा तयार गरिन्छन्, र प्रकाशनअघि तथ्य तथा भाषाको सम्पादकीय जाँच गरिन्छ। हाम्रो सम्पादकीय र एआई प्रयोग नीति: https://nmkhabar.com/ai-policy/ । कुनै त्रुटि भेटिएमा info@nmkhabar.com मा जानकारी दिनुहोस्, हामी तुरुन्त सच्याउँछौँ।

थप समाचार