जाजरकोटको भेरी नगरपालिका– २, रिसाङमा अविरल वर्षापछि गएको पहिरोले दुई जना बेपत्ता र १० जना घाइते भएका छन्। पहिरोले घर तथा टहरा भत्काउँदा यो घटना भएको हो।
जिल्ला प्रहरी कार्यालय जाजरकोटका सूचना अधिकारी प्रहरी निरीक्षक सुधीरकुमार खड्काका अनुसार भेरी नगरपालिका–२ फारुलाका ५४ वर्षीय उमासिंह खत्री र चिसापानीका ७० वर्षीय भीमबहादुर कार्की बेपत्ता छन्। पहिरोमा सात जना घाइते भएको प्रारम्भिक जानकारी आए पनि पछि १० जना घाइते भएको पुष्टि भएको छ।
घाइते हुनेहरूमा रामबहादुर शाही, सिद्धिबहादुर कामी, भद्राकली कार्की, केदार कार्की, मनवीर चदरा, मोतीकला विक, अनिता कार्की, युनिश शाही, सुन्तली चदरा र रती खत्री छन्। पहिरो आएपछि भाग्ने क्रममा केही व्यक्ति सम्पर्कविहीन भएका थिए।
घटनास्थलमा उद्धारका लागि नेपाली सेना, नेपाल प्रहरी र सशस्त्र प्रहरीको ५० जनाको टोली परिचालन गरिएको छ। भेरी नगरपालिका–३ स्यालाका पूर्णबहादुर विकको घर पहिरोले पूर्ण रूपमा क्षति भएको छ। भैरवी केसीका दुईवटा टिनका अस्थायी टहरा पनि पूर्ण रूपमा क्षति भएको छ।
सम्पर्कविहीनहरूको खोजी तथा घाइतेको उद्धार कार्य जारी रहेको प्रहरीले जनाएको छ।
