जनकपुरधामस्थित सिया रघुवर कुञ्जमा श्रद्धा, भक्ति र भव्य उल्लासका साथ अन्नकूट महोत्सव सम्पन्न भएको छ। श्री सिया रघुवर कुञ्जका मानमहन्त बाबा किशोरज्यूको विशेष आयोजनामा प्रभु श्री सीताराम जीको चरणकमलमा छप्पन भोगभन्दा बढीका दिव्य परिकार श्रद्धापूर्वक अर्पण गरियो।
महोत्सवको मुख्य आकर्षणका रूपमा भगवान् सीतारामलाई विभिन्न प्रकारका स्वादिष्ट व्यञ्जन, परिकार र अन्नका परिकारहरू भव्यताका साथ सजाइएको थियो। यस अवसरमा मन्दिर परिसरलाई फूल, माला र रंगीन बत्तीहरूले मनमोहक ढङ्गले सजाइएको थियो, जसले सम्पूर्ण वातावरणलाई आध्यात्मिक र दिव्य बनाएको थियो। महोत्सवमा उपस्थित भक्तजनहरूले महाप्रसाद ग्रहण गर्नुका साथै प्रभु श्री सीताराम सरकारको दर्शन गरी आशीर्वाद प्राप्त गरेका थिए।
यस भव्य धार्मिक तथा सांस्कृतिक उत्सवको महत्वमाथि प्रकाश पार्दै समाजशास्त्री मनीष श्री ओमले यस्ता कार्यक्रमले जनकपुरधामको गरिमालाई अझ उच्च बनाउने बताए। उनका अनुसार, यस्ता धार्मिक गतिविधिले हिन्दू सनातन धर्ममा जनकपुरधामको ऐतिहासिक पहिचानलाई अझ गहिरो रूपमा झल्काउनुका साथै यसलाई विश्वसामु एक प्रमुख आध्यात्मिक तथा आकर्षक केन्द्रका रूपमा स्थापित गर्न महत्वपूर्ण भूमिका खेल्छन्।
मानमहन्त बाबा किशोरज्यूको कुशल नेतृत्वमा सम्पन्न भएको यस अन्नकूट महोत्सवले जनकपुरधामको सांस्कृतिक वैभवलाई पुनः एकपटक उचाइमा पुर्याएको छ। कार्यक्रमको अन्त्यमा, प्रभु श्री सीताराम सरकारको असीमित कृपा र आशीर्वाद सम्पूर्ण भक्तजनहरूमा सदैव बनिरहोस् भन्ने कामनासहित विशेष प्रार्थना गरिएको थियो।
