झापाको मेचीनगरमा सादा पोसाकको प्रहरी हुँ भन्दै सर्वसाधारणलाई धम्क्याएर लुटपाट गर्ने दुई जनालाई प्रहरीले लागूऔषधसहित पक्राउ गरेको छ। इलामको माई नगरपालिका–१ घर भई मेचीनगर–६ पिङ्की ठ्याक बस्ने तीर्थ गिरीलाई लुटपाट गरी फरार भएका उनीहरूलाई प्रहरीले नियन्त्रणमा लिएको हो।
जिल्ला प्रहरी कार्यालय झापाका सूचना अधिकारी प्रहरी निरीक्षक विजय चौहानका अनुसार आइतबार दिउँसो १२ बजेको समयमा अपरिचित दुई पुरुषले गिरीलाई रोकेका थिए। आफूहरू सादा पोसाकको प्रहरी भएको बताउँदै उनीहरूले गिरीको साथमा रहेको मोबाइल, ६०० रुपैयाँ नगद, नागरिकता, स्वास्थ्य बिमाको कागजपत्र र सुनको फुली लुटेका थिए।
घटनाको सूचना पाउनासाथ इलाका प्रहरी कार्यालय काँकरभिट्टाबाट खटिएको प्रहरी टोलीले हुलियाका आधारमा खोजी सुरु गरेको थियो। मेचीनगर–६ भानुटोल बस्ने प्रलाद कार्कीको कोठामा खानतलासी गर्दा लुकाइराखेको अवस्थामा खैरो हिरोइनजस्तो देखिने २ पोका लागूऔषध बरामद भएको प्रहरीले जनाएको छ। बरामद भएको लागूऔषध १ ग्राम ९१० मिलिग्राम थियो।
सोही कोठाबाट पीडित गिरीको लुटिएको नागरिकता र सुनको फुली जस्तो देखिने धातुसमेत बरामद भएको छ। प्रहरीले लुटपाट र लागूऔषध कारोबारमा संलग्न रहेको आरोपमा प्रलाद कार्की र मेचीनगर–७ कञ्चनजङ्घा टोलका २२ वर्षीय विशाल बास्कोटालाई पक्राउ गरेको छ।
पक्राउ परेका दुवै जना विरुद्ध डाँका सम्बन्धी कसूर र लागूऔषध नियन्त्रण ऐनअन्तर्गत मुद्दा दर्ता गरिएको छ। जिल्ला अदालत झापाबाट पाँच दिनको म्याद थप गरी घटनाबारे थप अनुसन्धान भइरहेको जिल्ला प्रहरी कार्यालय झापाले जनाएको छ।
