बिर्तामोडकी २१ वर्षीया सबिना राजवंशीलाई बिजुलीको पोलमा बाँधेर कालोमोसो दल्ने चार जना पक्राउ परेका छन्। कनकाई नगरपालिका–८ का २० वर्षीया सबिना मुर्मु, २५ वर्षीया स्वस्तिका मुर्मु, १८ वर्षीय समिर मर्डी र १९ वर्षीया पुजा बस्नेतलाई प्रहरीले नियन्त्रणमा लिएको हो। उनीहरूले पुरानो रिसइबीका कारण राजवंशीमाथि दुर्व्यवहार गरेको प्रारम्भिक अनुसन्धानले देखाएको छ।
गत मंगलबार साँझ करिब ६:३० बजे बिर्तामोड नगरपालिका–२ स्थित राजगढ़ जाने बाटोमा घटना भएको थियो। सूचना पाएलगत्तै इलाका प्रहरी कार्यालय अनारमनीको टोली घटनास्थल पुगेको थियो। प्रहरीले युवतीलाई पोलमा हात बाँधेको र अनुहारमा कालो मोसो दलिएको अवस्थामा फेला पारेको थियो।
जिल्ला प्रहरी कार्यालय झापाका सूचना अधिकारी प्रहरी निरीक्षक विजय चौहानका अनुसार पक्राउ परेकाहरूको साथबाट घटनामा प्रयोग गरिएको कालो मोबिलको बट्टा र १६ थान पम्प्लेट बरामद गरिएको छ। ‘पुरानो रिसइबीका कारण युवतीमाथि अमानवीय व्यवहार भएको खुलेको छ,’ चौहानले भने।
पक्राउ परेका चारै जनालाई इलाका प्रहरी कार्यालय अनारमनीमा राखी थप कानुनी प्रक्रिया अगाडि बढाइएको छ। दुर्व्यवहारमा परेकी सबिना राजवंशीको बिर्तासिटी अस्पतालमा उपचार भइरहेको छ। उनको स्वास्थ्य अवस्था सामान्य रहेको प्रहरीले जनाएको छ।
