मोरङको कानेपोखरी–६, रमाइलो बजारस्थित ‘शुभलक्ष्मी अधिकारी सुनचाँदी पसल’का सञ्चालकबाट करोडौँ रुपैयाँ ठगिएको भन्दै थप ११ जना पीडितले जिल्ला प्रशासन कार्यालय मोरङमा संयुक्त उजुरी दर्ता गराएका छन् । असार १ गते दर्ता भएको उजुरीमा पसल सञ्चालक होमनाथ अधिकारी, श्रीमती बाटुलादेवी, छोराहरू ध्रुव र मनोज तथा बुहारीहरूले सर्वस्व हिनामिना गरेको उल्लेख छ । यसअघि जेठ ७ गते विष्णुमाया गिरीले २९ लाख १७ हजार रुपैयाँ ठगीको जाहेरी दिएकी थिइन् ।
उजुरी दिन पुगेका पीडितहरूको अवस्था दयनीय छ । कसैले जीवनभरिको कमाइ, कसैले रोगको उपचारका लागि साँचेको रकम हिनामिना हुँदा उनीहरू सडकमा पुगेका छन् । दुर्गामाया मंग्रातीले आफू र बुबा वीरबहादुर बयलकोटीको रकम फिर्ता नपाएको बताइन् । ‘मेरो बुबाले वृद्धभत्ता जम्मा गर्नुभएको थियो । पैसाको कुरा गर्दागर्दै उहाँ बित्नुभयो,’ उनले भनिन् ।
क्यान्सर रोगी ७४ वर्षीय नारायण धिमाल नियमित किमोथेरापी गराइरहेका छन् । जम्मा गरेको २ लाख ६५ हजार रुपैयाँ फिर्ता नहुँदा उपचार कसरी गर्ने भन्ने चिन्ता छ । ‘चुरोट–सुर्ती बेचेर कनीकुथी जम्मा गरेको पैसा हो यो । फोक्सोको क्यान्सर भएकाले उपचारका लागि पैसा छैन,’ उनले भनिन् । ‘बीमा पनि बन्द भयो, अब उपचार गर्ने पैसा छैन । हामीलाई हाम्रो पैसा दिलाइदिनु पर्यो ।’
गंगाबहादुर गुरुङ र डेगमाया गुरुङले करिब ११ लाख रुपैयाँ पसलमा बचत गरेका थिए । स्थानीय वृद्ध बलमाया गुरुङले बाख्रा र खसी–बोका पालेर, गोबर सोहोर्दै दुःखजिलो गरी १६ लाख ५० हजार रुपैयाँ बचत गरेकी थिइन् । ‘हामी बर्बाद भयौँ,’ उनले भनिन् । दिलमाया धिमालले बहिनीको ४ लाख ६९ हजार ६९७ रुपैयाँ उक्त पसलमा राखेकी थिइन् । बैंकमा राख्दा झन्झटिलो हुने भएकाले सुनपसलमा रकम राखेको उनले बताइन् ।
प्रशासनमा पेस भएको निवेदन अनुसार थप ११ पीडितमा अर्जुन संग्रौला, नारायण धिमाल, हरि पौडेल, दिलमाया धिमाल, छलीमाया संग्रौला, वीरबहादुर बयलकोटी, दुर्गामाया मंग्राती, बख्रेलाल धिमाल, कलवाती गुरुङ, सलबहादुर गुरुङ र गंगाबहादुर गुरुङ–डेगमाया गुरुङ छन् ।
करिब २५० सर्वसाधारणको झन्डै १२ करोड रुपैयाँ हिनामिना गरी सञ्चालक होमनाथ र बाटुलादेवी अमेरिका भाग्ने तयारीमा थिए । स्थानीय स्तरमै घटना दबाउन भूमि आयोग मोरङका निवर्तमान अध्यक्ष नवीन पौडेलको नेतृत्वमा ‘ऋण असुली समिति’ गठन गरिएको थियो ।
प्रशासनको अनुसन्धान अनुसार, पौडेलले पीडितहरूलाई कानुनी दायरामा जानबाट रोक्दै मिलाइदिने बहानामा अलमल्याए । सञ्चालक बाटुलादेवीको १ बिघा जग्गा पौडेलले निकटस्थ काशीराज थापाको नाममा पास गराई प्लटिङ गर्न थाले । पौडेलले मुख्य निवेदक विष्णुमाया गिरीलाई ‘तेरो पैसा कुनै हालतमा दिन्नँ, गएर झुण्डिएर मर’ भन्दै धम्की दिएको पीडित बताउँछन् ।
पौडेलसहितको समितिले रकम फिर्ता गराउनुको सट्टा पीडितहरूसँग पैसा उठाएको आरोप छ । पीडित अर्जुन संग्रौलाले आफूहरूसँग डुबेको एक लाख बराबर १ हजार उठाएर समितिले लगेको बताए । ‘पैसा उठाउन भन्दै पीडितहरूसँगै पैसा उठाए । मैले ५ हजार दिएको छु । कसैले १६ हजार, कसैले १० हजार दिएका छन्,’ उनले भने, ‘पैसा फिर्ता गराउनुको साटो हामीसँगै पैसा उठाए । अहिलेसम्म केही पनि भएन ।’
