काठमाडौं महानगरपालिकाले यस वर्ष ७४ स्थानमा मनसुनजन्य विपद्को उच्च जोखिममा रहेको पहिचान गरेको छ। जोखिममा रहेका स्थानमा जनधनको क्षति कम गर्न महानगरले सोहीअनुरुप कार्यक्रम गर्ने तयारी गरेको छ।
महानगरपालिकाका नगर प्रहरी वरिष्ठ उपरीक्षक विष्णुप्रसाद जोशीले १ देखि ३२ वटै वडाका प्रतिनिधि र नागरिकसँगको छलफल तथा विगतका घटनाहरूको अध्ययनबाट जोखिमयुक्त स्थान पहिचान गरिएको बताए। खोला किनारका बस्ती स्थानान्तरण भएकाले यस वर्ष नदीजन्य विपद्का घटनामा कमी आउने अपेक्षा गरिएको छ।
विपद् पूर्वतयारी अन्तर्गत, डुबानमा परेका नागरिकको उद्धारका लागि चारवटा डुङ्गा तयारी अवस्थामा राखिएको छ। उद्धार कार्यबारे कृत्रिम अभ्यास पनि गरिएको छ। उद्धारका लागि आवश्यक मेसिनरी सामान र त्रिपाललगायतका सामग्री तयार पारिएको छ।
मनसुनजन्य विपद् व्यवस्थापन र पूर्वतयारीलाई प्रभावकारी बनाउन सुरक्षा निकाय र विभिन्न सरोकारवाला संघसंस्थाको सहकार्यमा क्षमता अभिवृद्धि तालिम तथा कृत्रिम अभ्यास कार्यक्रम सम्पन्न भइसकेको छ।
पछिल्लो समय काठमाडौंमा बढ्दो सहरीकरण, सडक ढलान प्रक्रिया र सरोकारवाला निकायको छलफल बिना सडक खन्ने र पुर्ने कार्यले नदीजन्य विपद्का घटनाहरू बढिरहेको छ।
महानगरले विपद्का बेला अपनाउनुपर्ने सावधानी र उद्धारका विभिन्न विधिको प्रयोगात्मक अभ्यास गरिसकेको छ। सहरी विपद् जोखिम न्यूनीकरणका लागि समुदायस्तरीय क्षमता विकास, आन्तरिक र साझेदारबीचको समन्वय आवश्यक रहेको महानगरले जनाएको छ।
