रसुवागढी भन्सार कार्यालय बाढीले थला परेपछि चीनबाट हुने व्यापारिक आयात कोरला नाकामा केन्द्रित भएको छ। यसले उपल्लो मुस्ताङको कोरला नाकामा कन्टेनर र विद्युतीय सवारीसाधन (ईभी)को चाप बढाएको छ।
लोमान्थाङ गाउँपालिका–४, नेचुङमा रहेको मुस्ताङ भन्सार कार्यालयले कोरला नाकाबाट आयात बढेको पुष्टि गरेको छ। चीनबाट विद्युतीय सवारीसाधन, घरायसी सामान, कस्मेटिक्स, कपडा र जुत्ता बोकेका कन्टेनरको संख्या बढेको छ। चाडपर्व लक्षित सामग्रीको आयात पनि बढेको छ।
रसुवागढी नाका अवरुद्ध भएपछि व्यवसायीले कोरलालाई वैकल्पिक मार्ग बनाएका छन्। यसले कोरला नाकाको पूर्वाधार र व्यवस्थापनमाथि प्रश्न उठाएको छ।
