एमाले कोशी प्रदेशका इन्चार्ज एवं केन्द्रीय सचिव शेरधन राईले मुख्यमन्त्री हिक्मतकुमार कार्कीलाई राजीनामा दिन निर्देशन दिएका छन्। राईले शनिबार कार्कीसँग भेट गरी राजीनामाको आग्रह गरेका हुन्।
मुख्यमन्त्री कार्कीले पार्टीको संस्थागत निर्णय नआएसम्म राजीनामा नदिने अडान लिएका छन्। ‘शेरधन राईले राजीनामा दिनुपर्यो भन्नुभयो,’ स्रोतले भन्यो, ‘मुख्यमन्त्रीज्यूले राजीनामा नदिने बरु संस्थागत निर्णय चाहिने अडान राख्नुभयो।’
विराटनगर आइपुगेलगत्तै राई नयाँ सरकार गठनका लागि सक्रिय भएका हुन्। उनले प्रदेश सांसदहरूसँग छलफल गरेका थिए। ‘समाचारमा कोशीको यही सरकारको निरन्तरता, मुख्यमन्त्रीको निरन्तरता भन्ने आइरहेको छ। त्यस्तो होइन, नयाँ निर्णय आउँछ,’ राईले भने।
कार्की संविधानको धारा १६८ (५) बमोजिम मुख्यमन्त्री बनेका हुन्। उपधारा ५ अनुसार बनेको सरकारका मुख्यमन्त्रीले राजीनामा नदिएसम्म पार्टीले हटाउन सक्दैन। यस कारण एमालेलाई कोशीमा मुख्यमन्त्री फेर्न समस्या भएको छ। कार्की २०८१ वैशाख २७ गते एमाले र माओवादीका ५२ सांसदको समर्थनमा मुख्यमन्त्री नियुक्त भएका थिए।
