रसुवाको भोटकोशी नदीमा आएको विनाशकारी बाढीले कोशी प्रदेशका १५९ जना नागरिक अझै सम्पर्कविहीन छन्। १९३ जना प्रभावित भएकामा १५९ जना बेपत्ता छन्। ५ जनाको जीवितै उद्धार भएको छ। २७ जना सम्पर्कमा आएका छन्। १ जनाको मृत्यु पुष्टि भएको छ।
रसुवा, नुवाकोट र धादिङमा कार्यरत मजदुर, चालक, होटल व्यवसायी र तीर्थयात्रीहरू बेपत्ता भएका छन्। परिवार र आफन्तजन चिन्तामा छन्। सोलुखुम्बुका ४२ जना, ओखलढुंगाका २५ जना, सुनसरीका १६ जना र उदयपुरका १६ जना बेपत्ता छन्।
झापाका १३ जना बेपत्ता छन्। १ जनाको जीवितै उद्धार भएको छ। मोरङका १७ जना र खोटाङका ११ जना फेला परेका छैनन्। इलामका ९ जना बेपत्ता छन्। १ जनाको शव फेला परेको छ। २ जनाको उद्धार भएको छ।
विपद्मा परेका अधिकांश जलविद्युत आयोजनाका प्राविधिक र मजदुर हुन्। अप्पर त्रिशुली–१, चिनियाँ हाइड्रो प्रोजेक्ट, त्रिशुली–३ बी, र साञ्जेन हाइड्रोपावरमा कार्यरत इन्जिनियर, चालक र भान्सेहरू बेपत्ता भएका छन्। केही मानसरोवर र गोसाईंकुण्ड तीर्थयात्रामा गएका बेला सम्पर्कविहीन भएका हुन्।
टिमुरे बजार, धुन्चे, रसुवागढी नाका र लाङटाङ क्षेत्र बढी प्रभावित भएका थिए। केही व्यक्तिहरू तिब्बततर्फ सामान लिन वा पदयात्रामा जाँदा सम्पर्कविहीन भएका हुन्। सोलुखुम्बुका पर्यटन व्यवसायी र गाइडहरू तिब्बत यात्रामा बेपत्ता भएका छन्।
हालसम्म उद्धार र सम्पर्कमा आएका व्यक्तिको सङ्ख्या कुल प्रभावितको करिब २१ प्रतिशत मात्र छ। बेपत्ताको सङ्ख्या ठूलो भएकाले उद्धार र खोजी कार्य जारी छ।
