कोशी प्रदेश सरकारले हप्ताको ६ दिन कार्यदिन कायम गर्ने गरी दुई दिने सार्वजनिक बिदा (शनिबार र आइतबार) खारेज गर्ने तयारी गरेको छ। पेट्रोलियम पदार्थको खपत कम गर्ने उद्देश्यले सुरु गरिएको यो व्यवस्था प्रभावकारी नभएको निष्कर्ष निकाल्दै सरकारले पुरानै कार्यतालिकामा फर्किने गृहकार्य अघि बढाएको हो।
प्रदेशका मुख्यमन्त्री हिक्मतकुमार कार्कीले सामाजिक सञ्जालमार्फत यस विषयमा सुझाव मागेका छन्। उनले हप्ताको ५ दिन काम गर्दा कार्य दिन नपुग्ने र खर्च तथा इन्धन बचतमा खासै उपलब्धि नदेखिएको भन्दै ६ दिन काम गर्दा कस्तो होला भनी नागरिक र सरोकारवालाहरूसँग राय मागेका हुन्।
गत चैत २२ गतेदेखि लागू भएको दुई दिने बिदाको व्यवस्था पेट्रोलियम पदार्थको मूल्य वृद्धि र आपूर्ति असहजतालाई मध्यनजर गरी बालेन शाह नेतृत्वको सरकारले सुरु गरेको थियो। यसको मुख्य उद्देश्य इन्धन खपत र प्रशासनिक खर्च घटाउनु थियो।
यद्यपि, यो व्यवस्था लागू भएपछि सेवाग्राहीहरू मारमा परेको, सरकारी कामकारबाही सुस्त भएको र इन्धन तथा प्रशासनिक खर्च बचतमा अपेक्षित सुधार नआएको भन्दै यसको आलोचना हुँदै आएको छ।
मुख्यमन्त्री कार्कीले फेसबुकमार्फत सुझाव मागेपछि कोशी प्रदेशमा दुई दिने बिदा कटौती हुने सम्भावना बढेको छ। सर्वसाधारण र विज्ञहरूले समेत सार्वजनिक सेवा प्रवाहमा असर परेको भन्दै यसको कटौतीको पक्षमा सकारात्मक प्रतिक्रिया दिएका छन्।
यस विषयमा कोशी प्रदेश मन्त्रिपरिषद्को आगामी बैठकले औपचारिक निर्णय गर्ने स्रोतले जनाएको छ। यदि यो निर्णय भएमा कोशी प्रदेश दुई दिने बिदा नीति उल्ट्याएर पुनः ६ दिने कार्यतालिकामा फर्किनेछ।
