धादिङको कृष्णभीरमा सडक भासिएपछि लमजुङ–काठमाडौँ यात्रा १२ घण्टासम्म लम्बिएको छ। भदौ १४ गते सडक भासिएपछि नियमित मार्ग अवरुद्ध छ। बेँसीसहरबाट काठमाडौँका लागि वैकल्पिक बाटो प्रयोग गर्दा यात्रुहरूले दोब्बर भाडा तिर्नुपरेको छ।
सामान्य अवस्थामा पाँच–छ घण्टामा पूरा हुने यात्रा अहिले १२–१३ घण्टासम्म लाग्ने गरेको छ। यसले यात्रुहरूको खर्चसमेत बढाएको छ। बेँसीसहरबाट काठमाडौँ चल्ने माइक्रोबस तथा ठुला बसहरू चितवन, हेटौँडा हुँदै दक्षिणकालीको वैकल्पिक मार्ग प्रयोग गरिरहेका छन्।
यो लामो र घुमाउरो बाटोका कारण यात्रुको समय र खर्च दुवै बढेको छ। सवारीसाधन तथा यात्रुको सङ्ख्यामा समेत कमी आएको छ। बेँसीसहर–काठमाडौँ माइक्रोबसका चालक मुस्कान राईले वैकल्पिक मार्गबाट काठमाडौँ पुग्न निकै बढी समय लाग्ने बताए।
बेँसीसहर माइक्रो काउन्टरका अनुसार सडक अवरुद्ध हुनुअघि दैनिक ४०–५० वटा माइक्रोबस काठमाडौँ जाने गरेकामा अहिले पाँच–सात वटा मात्र सञ्चालनमा छन्। अत्यावश्यक काम परेका यात्रुहरू मात्र यात्रा गरिरहेका छन्।
सडक अवरुद्ध हुनुअघि डिजेल माइक्रोबसको भाडा रु ९०० र विद्युतीय माइक्रोबसको रु ७०० थियो। अहिले क्रमशः रु दुई हजार र रु एक हजार ५०० पुगेको छ। यात्रु तथा सवारीसाधन घटेसँगै चालक तथा व्यवसायीको आम्दानीमा असर परेको छ।
पृथ्वी राजमार्ग बस काउन्टरका अनुसार यसअघि बेँसीसहरबाट काठमाडौँ दैनिक पाँच–छ वटा ठुला बस छुट्ने गरेकामा अहिले एउटा बसमात्र जाने गरेको छ। वैकल्पिक मार्गअनुसार भाडा फरक पर्ने भएकाले निश्चित भाडा तोकिएको छैन। पहिलेको तुलनामा भाडा दुई गुणाभन्दा बढी भएको छ।
सडक अवरोधको असर उपचारका लागि ‘रेफर’ हुने बिरामीको यात्रामा पनि परेको छ। लमजुङ अस्पतालका सूचना अधिकारी अनिल रेग्मीका अनुसार अस्पतालमा उपचार सम्भव नभएका बिरामीलाई काठमाडौँ, चितवन र पोखरा रेफर गर्ने गरिएको छ।
काठमाडौँ लैजानुपर्ने केही बिरामीलाई एम्बुलेन्समै घुमाउरो बाटोबाट लैजानुपरेको छ। कतिपयलाई पोखरासम्म एम्बुलेन्समार्फत पुर्याएर हेलिकप्टरमार्फत लैजानुपर्ने अवस्था छ। यसले बिरामी र आफन्तलाई झन्झटसँगै उपचार खर्चसमेत बढाएको छ।
बेँसीसहरकी प्रकृति श्रेष्ठले वैकल्पिक मार्गबाट यात्रा गर्दा समय र खर्च दुवै बढेको बताइन्। उनी काठमाडौँबाट फर्किँदा रु ९०० को यात्राका लागि रु दुई हजार भाडा तिर्नुपरेको बताउँछिन्। “वैकल्पिक बाटो निकै लामो र थकाइलाग्दो रहेछ। वर्षाका कारण बाटो चिप्लो हुने र पहिरोको जोखिमसमेत छ”, उनले भनिन्।
नियमित मार्ग सञ्चालनमा नआएसम्म लामो यात्रा, बढेको भाडा र वैकल्पिक मार्गको जोखिमले यात्रुले सास्ती खेप्नुपर्नेछ।
