श्रम तथा व्यवसायजन्य सुरक्षा विभागले साउन महिनामा १ करोड ४० लाख ५२ हजार ८ सय १५ रूपैयाँ बराबरको पारिश्रमिक भुक्तानी गराएको छ। विभागले श्रमिकहरूको अधिकार रक्षा, बालश्रम नियन्त्रण र श्रम विवाद समाधानमा सक्रियता देखाएको छ।
श्रमिकहरूबाट परेका निवेदन वा मुद्दाका आधारमा आपसी सहमतिमा ७२ लाख ७१ हजार ९ सय २७ रूपैयाँ भुक्तानी गराइएको छ। विभिन्न शीर्षकमा दण्ड, जरिबाना तथा क्षतिपूर्ति बापत ७१ लाख ३५ हजार ३ सय ७१ रूपैयाँ असुली गर्ने निर्णय भएको छ।
बालश्रम उन्मुलनका लागि देशैभर ३ सय ७१ वटा बालश्रम निरीक्षण गरिए। बालश्रम गराउने प्रतिष्ठान तथा व्यक्तिहरूलाई २ लाख २० हजार जरिबाना गरियो।
श्रम ऐन र सुरक्षा मापदण्ड पालना गराउन ३ सय ७१ प्रतिष्ठान र १४२ ब्वायलरको निरीक्षण गरियो। २१ वटा श्रमिक आपूर्तिकर्ता कम्पनीहरूको पनि अनुगमन भयो।
यस अवधिमा ३ सय व्यक्तिगत र २६ सामूहिक दाबी उजुरी दर्ता भए। ८१ वटा श्रम विवाद आपसी समझदारी र कानुनी प्रक्रियाबाट समाधान गरिए। साउन महिनामा एक औद्योगिक दुर्घटनामा एक श्रमिकको मृत्यु भयो।
विभागले सेवा प्रवाहलाई मर्यादित र जनमुखी बनाउन सुशासनका सूचकाङ्कहरू लागू गरेको छ। गुनासो व्यवस्थापनमा ‘पहिले आउनेलाई पहिले सेवा’को आधारमा छिटोछरितो सेवा प्रदान भइरहेको छ। सेवाग्राहीहरूसँग शिष्ट व्यवहार, उजुरी पेटिकाको नियमित निरीक्षण, मासिक छलफल र प्रभावकारी जनसम्पर्क कार्यहरू भइरहेको विभागले जनाएको छ।
