मधेस प्रदेशमा जनचेतनाको अभावले रक्तदानमा कमी आउँदा गम्भीर रगतको अभाव सिर्जना भएको छ। रक्तदान गर्दा शारीरिक रूपमा कमजोर भइन्छ भन्ने गलत मानसिकताले प्रदेशमा रक्तदान गर्नेको सङ्ख्या न्यून छ।
यस समस्यालाई केही हदसम्म न्यूनीकरण गर्ने उद्देश्यले जनकपुरमा खुला रक्तदान कार्यक्रम आयोजना गरियो। नेपाल औषधि तथा बिक्री प्रतिनिधि संघ जनकपुरले मधेस रक्तसञ्चार सेवा मुजेलियासँगको सहकार्यमा कार्यक्रम आयोजना गरेको थियो। कार्यक्रममा ४० पिन्ट रगत सङ्कलन भयो, यद्यपि अपेक्षा गरिएको ५०/६० पिन्ट सङ्कलन हुन सकेन।
संघका वरिष्ठ उपाध्यक्ष विजयकुमार यादवले स्थापना दिवसको अवसरमा कार्यक्रम आयोजना गरिएको बताए। उनले कार्यक्रममा धेरै मानिस सहभागी भए पनि कतिपयले रगत दिन नमानेकोमा चिन्ता व्यक्त गरे। रगतको अभावमा कसैको अकालमा मृत्यु नहोस् भन्ने उद्देश्यले यो कार्यक्रम गरिएको उनले बताए।
स्वास्थ्यकर्मीहरूका अनुसार सरोकारवाला संघसंस्थाले पनि ‘रगत दिए केही हुँदैन’ भन्ने चेतना फैलाउन नसक्दा रक्तदानका लागि मानिसहरू अग्रसर हुन सकेका छैनन्। मधेस रक्तसञ्चार सेवा मुजेलियाका अनुसार दैनिक ३०/३५ जना रगत लिन आउने गरेका छन्, तर उनीहरूलाई रगत उपलब्ध गराउन समस्या भइरहेको छ।
ल्याब टेक्निसियन श्रवजीत यादवले आपतविपत्मा परेकाहरूलाई तत्काल रगत सङ्कलन गर्नुपर्दा डोनरहरूको सूचीबाट फोन गरेर बोलाउने गरेको बताए। उनले आवश्यक परेमा ताजा रगत उपलब्ध गराउने व्यवस्था मिलाउने गरेको जानकारी दिए।
नेपाल रेडक्रस सोसाइटीको रक्तसञ्चार केन्द्रमा पनि रगतको अभाव छ। केन्द्रमा जम्मा २/४ पिन्ट रगत मौज्दात छ, तर दैनिक ४०/५० पिन्टसम्म रगतको माग हुने गरेको छ। बिरामीका आफन्तहरू रगत लिन आउँदा रगत दिन सक्ने मान्छे भएमा बोलाउनुस् भन्दै जसोतसो उपलब्ध गराउने गरिएको केन्द्रले जनाएको छ।
कतिपय अवस्थामा बाहिरबाट रगत मगाउनुपर्ने बाध्यतासमेत सिर्जना हुने गरेको छ। स्वास्थ्यकर्मीहरूले प्रदेशमा रक्तदान गर्ने महिलाहरूको सङ्ख्या पनि निकै न्यून रहेको बताएका छन्।
