जनमत पार्टीले समर्थन फिर्ता लिएपछि मधेशका मुख्यमन्त्री कृष्णप्रसाद यादव आज बिहान ११ बजे विश्वासको मत लिँदैछन्।
जनमत पार्टीले वैशाख २२ गते समर्थन फिर्ता लिएपछि मुख्यमन्त्री यादव कानुनबमोजिम विश्वासको मत लिँदैछन्। सरकारमा सहभागी दलले समर्थन फिर्ता लिएको ३० दिनभित्र विश्वासको मत लिनुपर्ने प्रावधान छ।
मुख्यमन्त्री कार्यालयको वैशाख २८ को पत्राचारपछि सभामुख रामअशिष यादवले विश्वासको मतका लागि समय मिलाए।
मधेश प्रदेश सभामा हाल १०२ जना प्रदेश सभा सदस्य छन्। सरकारलाई बहुमतका लागि ५२ जना सदस्यको समर्थन आवश्यक पर्छ।
हाल मधेश प्रदेश सरकारसँग ६३ जना प्रदेश सभा सदस्यको समर्थन कायम छ। सरकारलाई नेपाली कांग्रेसका २२, जनता समाजवादी पार्टी (जसपा) नेपालका २६, र नेपाली कम्युनिस्ट पार्टीका १५ सदस्यको समर्थन छ। नेपाली कांग्रेस मधेश प्रदेश संसदीय दलले यो समर्थन पुष्टि गरेको छ।
