धनुषा, पर्सा र सर्लाहीमा प्रहरीले तीन जनालाई लागूऔषधसहित पक्राउ गरेको छ। सर्लाहीबाट मात्रै ३६२ ट्याब्लेट नाइट्राजेपाम र स्पास्मो बरामद भएको छ।
धनुषाको जनकपुरधाम उपमहानगरपालिका १६ बाट २५ वर्षीय नविन कुमार यादव पक्राउ परेका छन्। मुखियापट्टी मुसहरनिया गाउँपालिका १ का यादवको डेराबाट २ ग्राम ३०० मिलिग्राम खैरो हेरोइनजस्तो पदार्थ बरामद भयो। प्रहरीले एक डिजिटल तराजु र १४ हजार ४६५ रुपैयाँ नगद पनि फेला पारेको जिल्ला प्रहरी कार्यालय धनुषाले जनायो।
पर्साको वीरगञ्ज महानगरपालिका १९ तिलावे पुलबाट २२ वर्षीय विकास मिया मन्सुरी ५० ट्याब्लेट नियन्त्रित लागूऔषध नाइट्राजेपामसहित पक्राउ परेका छन्। वीरगञ्ज महानगरपालिका १२ मुर्ली निवासी मन्सुरीलाई अस्थायी प्रहरी पोस्ट बिन्दवासिनीको टोलीले नियन्त्रणमा लियो।
सर्लाहीको लालबन्दी नगरपालिका १ नवलपुर गोरूबजारबाट ३५ वर्षीय संजीव कुमार केसी २० ट्याब्लेट नाइट्राजेपामसहित पक्राउ परेका छन्। लालबन्दी नगरपालिका २ का केसीलाई इलाका प्रहरी कार्यालय लालबन्दीको टोलीले बा ५२ प ३३०५ नम्बरको मोटरसाइकलमा नियन्त्रणमा लियो।
प्रारम्भिक अनुसन्धानले केसीले आफ्नै घर पछाडिको खेतमा थप लागूऔषध लुकाएको खुलायो। सो स्थानमा खानतलासी गर्दा २१८ ट्याब्लेट नाइट्राजेपाम र १४४ ट्याब्लेट स्पास्मो बरामद भएको प्रहरीले जनायो।
प्रहरीले तीनै घटनाका सम्बन्धमा आवश्यक अनुसन्धान अघि बढाएको छ।
