राष्ट्रिय तथ्याङ्क कार्यालयले चालु आर्थिक वर्ष २०८२/८३ मा मधेस प्रदेशको आर्थिक वृद्धिदर १.३१ प्रतिशतमा खुम्चिने प्रारम्भिक अनुमान सार्वजनिक गरेको छ, जुन देशभरमै सबैभन्दा न्यून हो।
कृषि क्षेत्रमा परेको नकारात्मक प्रभावले धान, मत्स्य तथा वन क्षेत्रको योगदान घट्दा मधेसको आर्थिक वृद्धिदर कमजोर देखिएको छ। पर्याप्त वर्षा नहुँदा धान र मत्स्य उत्पादनमा नकारात्मक असर परेको तथ्याङ्क अधिकृत नरबहादुर कुँवरले जानकारी दिए।
यो विगत तीन वर्षयताकै सबैभन्दा कम आर्थिक वृद्धिदर हो। आर्थिक वर्ष २०८०/८१ मा मधेसमा ३.१८ प्रतिशत र आर्थिक वर्ष २०८१/८२ मा २.७२ प्रतिशत आर्थिक वृद्धि रहेको थियो। लगातार दुई वर्षयता कृषि उत्पादनमा नकारात्मक प्रभावले आर्थिक वृद्धिदर खस्कँदै गएको कार्यालयले जनाएको छ।
यसैबीच, चालु आर्थिक वर्षमा बागमती प्रदेशको आर्थिक वृद्धिदर भने सबैभन्दा उच्च रहने अनुमान गरिएको छ। राष्ट्रिय तथ्याङ्क कार्यालयका अनुसार बागमती प्रदेशको आर्थिक वृद्धिदर ५.४० प्रतिशत पुग्ने अनुमान छ।
आर्थिक वर्ष २०८२/८३ मा राष्ट्रिय वार्षिक कुल गार्हस्थ्य उत्पादनमा मधेस प्रदेशको योगदान १३.१ प्रतिशत रहने प्रारम्भिक अनुमान गरिएको छ। तथ्याङ्क सार्वजनिकीकरण कार्यक्रममा प्रदेशका नीति तथा योजना आयोगका सदस्य राजकिशोर सिंहले मधेस प्रदेशमा कृषिको योगदान घट्दा यो समस्या आएको बताए।
उनले आगामी बजेटमा कृषि, शिक्षा, स्वास्थ्य, पूर्वाधार र सामाजिक विकासलाई प्राथमिकतामा राख्ने जानकारी दिए।
