कोशी, बागमती र गण्डकी प्रदेशका पहाडी भू-भागका एक-दुई स्थानमा आज भारी वर्षाको सम्भावना छ। मौसम पूर्वानुमान महाशाखाले देशका अधिकांश हिमाली तथा पहाडी क्षेत्रमा मेघगर्जन र चट्याङसहित मध्यम वर्षाको आँकलन गरेको छ।
उच्च हिमाली क्षेत्रमा वर्षासँगै हिमपातको समेत सम्भावना छ। तराईका एक-दुई स्थानमा पनि मेघगर्जन तथा चट्याङसहित मध्यम वर्षा हुने आँकलन गरिएको छ।
राति पनि हिमाली तथा पहाडी क्षेत्रमा सामान्य बदली रहनेछ। तराई क्षेत्रमा आंशिक बदलीको पूर्वानुमान छ। कोशी, बागमती, गण्डकी र कर्णाली प्रदेशका हिमाली भू-भागका थोरै स्थानमा हिमपात वा वर्षा हुन सक्नेछ।
लुम्बिनी र सुदूरपश्चिम प्रदेशका हिमाली भू-भागका एक-दुई स्थानमा पनि मेघगर्जनसहित मध्यम वर्षा वा हिमपातको सम्भावना छ। कोशी, बागमती र गण्डकी प्रदेशका पहाडी भू-भागका थोरै स्थानमा मध्यम वर्षाको आँकलन छ।
लुम्बिनी, कर्णाली र सुदूरपश्चिम प्रदेशका पहाडी भू-भागका एक-दुई स्थानमा पनि मेघगर्जनसहित मध्यम वर्षाको सम्भावना छ। कोशी, बागमती, गण्डकी र लुम्बिनी प्रदेशका तराई भू-भागका एक-दुई स्थानमा मेघगर्जनसहित मध्यम वर्षाको सम्भावना कायमै रहनेछ।
मौसम बदलीसँगै आउन सक्ने वर्षा र हिमपातलाई मध्यनजर गर्दै यात्रा, कृषि तथा दैनिक गतिविधि सञ्चालन गर्दा स्थानीय मौसम अवस्थाबारे जानकारी लिएर सावधानी अपनाउन सम्बन्धित निकायले आग्रह गरेको छ।
