शिक्षा तथा खेलकुद मन्त्रालयले आगामी शिक्षा ऐन निर्माणका लागि देशभर सञ्चालन गरेको ‘शिक्षा संवाद’ अभियानअन्तर्गत मधेस प्रदेशमा दोस्रो दिनको कार्यक्रम जनकपुरधाममा सम्पन्न भएको छ। यो अभियानको उद्देश्य शिक्षा क्षेत्रका सरोकारवालाहरूको सुझावलाई नीति निर्माणमा समेट्नु हो।
जनकपुरधामको श्री याज्ञवल्क्य संस्कृत माध्यमिक विद्यालय, ज्ञानकुण्डमा आयोजित उक्त कार्यक्रममा प्रधानाध्यापक एसोसिएसन नेपालको सहजीकरण रहेको थियो। मधेस प्रदेशका विभिन्न जिल्लाबाट २११ जना शिक्षा क्षेत्रका अगुवा, शिक्षक, प्रधानाध्यापक, अभिभावक र अन्य सरोकारवालाहरूको सहभागिता थियो।
कार्यक्रममा शिक्षाविद् डा. विद्यानाथ कोइराला, शिक्षा तथा खेलकुदमन्त्रीका सल्लाहकार शैलेन्द्र झा, विद्यालय शिक्षा महाशाखा प्रमुख शिव सापकोटा, प्रधानाध्यापक एसोसिएसन नेपालका अध्यक्ष सुदाम गौतम र शिक्षा अभियन्ता अभिषेक घिमिरे लगायतले शिक्षा सुधारका विभिन्न पक्षमा आ-आफ्नो धारणा राखेका थिए।
सरोकारवालाहरूले आगामी शिक्षा ऐनमा विद्यालय तहका व्यावहारिक समस्या, शिक्षक तथा विद्यालयको आवश्यकता र स्थानीय समुदायको भूमिकालाई प्राथमिकता दिनुपर्नेमा जोड दिएका थिए। उनीहरूले शिक्षालाई बलियो र गुणस्तरीय बनाउन समुदायको अपनत्व र सहभागिता बढाउनुपर्ने सुझाव दिएका छन्।
यसअघि विराटनगरमा सम्पन्न भएको ‘शिक्षा संवाद’ अभियानको दोस्रो दिन जनकपुरमा कार्यक्रम भएको हो। मन्त्रालयले सातै प्रदेशमा पुगेर स्थानीय सरोकारवालासँग प्रत्यक्ष संवाद गरी प्राप्त सुझावलाई शिक्षा ऐन र सुधारका नीतिमा समेट्ने लक्ष्य राखेको छ। शिक्षामन्त्रीका सल्लाहकार झाले कम्तीमा २५–३० वर्षसम्म काम गर्ने दूरदर्शी शिक्षा नीति निर्माण गर्नुपर्ने आवश्यकता औंल्याएका थिए।
