महोत्तरीमा ज्यान मार्ने उद्योगका आरोपी, रास्वपाका मनराशिसवा नगरपालिकाका पूर्वअध्यक्ष रमण सिंहलाई प्रहरीले पक्राउ गर्न पुग्दा सांसद हरि ढकालले आफ्नो गाडीमा राखेर लगेको आरोप छ। चितवन १ बाट निर्वाचित ढकालमाथि प्रहरीको पक्राउबाट जोगाउन सिंहलाई गाडीमा राखेर लगेको आरोप पीडित गोविन्द कुमार कापरले लगाएका छन्।
यो घटना आइतबार जिल्ला समन्वय समिति, महोत्तरीमा रास्वपाको लेखापरीक्षण कार्यक्रमका क्रममा भएको थियो। कार्यक्रममा सहभागी हुन पुगेका सांसद ढकालले प्रहरीले पक्राउ गर्न खोजेका सिंहलाई गाडीमा राखेर लगेको पीडित पक्षको दाबी छ।
सिंहविरुद्ध कापरले ज्यान मार्ने उद्योगमा जाहेरी दिएका थिए। सोही जाहेरीका आधारमा पक्राउ पुर्जी जारी भएपछि प्रहरी सिंहलाई पक्राउ गर्न पुगेको थियो।
प्रहरी सिंहलाई पक्राउ गर्ने तयारीमा रहँदा उनका समर्थकले नाराबाजी गर्दै प्रहरी टोलीलाई घेरेका थिए। प्रहरीलाई कार्यक्रमस्थलमा प्रवेश गर्न समेत अवरोध गरिएको थियो। सोही क्रममा सांसद ढकालले सिंहलाई आफ्नो गाडीमा राखेर लगेको आरोप छ।
जिल्ला प्रहरी कार्यालय महोत्तरीले घटनाको पुष्टि गरेको छ। प्रहरीका अनुसार गत जेठमा रास्वपाको नगर अधिवेशनका क्रममा दुई पक्षबीच झडप भएको थियो। उक्त घटनामा गोविन्द कुमार कापरसहित केही व्यक्ति घाइते भएका थिए।
कापरको जाहेरीका आधारमा सिंहविरुद्ध पक्राउ पुर्जी जारी भएको थियो। प्रहरीका अनुसार रास्वपाका केही कार्यकर्ताले होहल्ला गर्दै पक्राउमा अवरोध गर्न खोजेका थिए। सोही क्रममा पार्टीका एक नेताले आरोपीलाई आफ्नो गाडीमा राखेर लगेको प्रहरीको भनाइ छ।
गत जेठ १७ गते मनराशिसवा नगरपालिकामा रास्वपाको नगर अधिवेशनका क्रममा झडप भएको थियो। उक्त झडपमा बथनाहाका २८ वर्षीय गोविन्द कुमार कापर, २५ वर्षीय अभिषेक झा र रविशंकर चौधरी घाइते भएका थिए।
घटनापछि कापर पक्षले रमण सिंहविरुद्ध जिल्ला प्रहरी कार्यालय महोत्तरीमा जाहेरी दिएको थियो।
सिंहले आफू पुनः नेतृत्वमा आउने गरी निर्वाचन प्रक्रियामा सहभागी नहुने अडान राखेको विषयमा कापर पक्षले विरोध गरेपछि विवाद झडपमा परिणत भएको थियो।
सिंहविरुद्ध परेको जाहेरी फिर्ता लिन पीडित पक्षलाई दबाब दिइएको आरोप छ। पीडित पक्षका अनुसार जाहेरी मिलाउन सांसद ढकालले जिल्ला प्रशासन कार्यालयमा छलफलका लागि बोलाएका थिए। तर कापर पक्षले जाहेरी फिर्ता लिन अस्वीकार गरेको थियो।
आरोपीलाई पक्राउ गर्न पुगेका प्रहरीलाई रोक्दै सांसद ढकालले आफ्नै गाडीमा राखेर लगेको आरोप सार्वजनिक भएपछि सामाजिक सञ्जालमा रास्वपाको आलोचना भइरहेको छ।
