इलाम नगरपालिका–९ को राजदुवाली सडकखण्डमा सडकको ठूलो हिस्सा खोलामा बगेपछि मेची राजमार्ग महिना दिनभन्दा बढी समयदेखि अवरुद्ध छ। यसले गर्दा इलाम, पाँचथर र ताप्लेजुङको झापासँगको सडक सम्पर्क पूर्ण रूपमा विच्छेद भएको छ।
सडक डिभिजन कार्यालय इलामका अनुसार तत्काल पहिरो पन्छाएर सडक सञ्चालनमा ल्याउन सकिने अवस्था छैन। भासिएको भाग पुरेर ग्राभेल गर्ने र अस्थायी नाली निर्माण गरी सडक सञ्चालनयोग्य बनाउने तयारी छ। तर, वर्षाले बनाइएका संरचना पुनः बगाउने जोखिम कायमै छ।
राजमार्ग बन्द हुँदा यात्रुहरूले डेढ किलोमिटर पहिरो प्रभावित क्षेत्र पैदल पार गर्नुपर्ने बाध्यता छ। जोखिमपूर्ण यात्रामा बिरामी, ज्येष्ठ नागरिक र बालबालिकालाई बढी कठिनाई भएको छ। सेना, सशस्त्र र नेपाल प्रहरीले स्टेचरमा बिरामीलाई बोकेर खण्ड पार गराउन सहयोग गरिरहेका छन्।
सडक अवरोधले दैनिक उपभोग्य वस्तुको आपूर्ति र मूल्यमा समेत असर पारेको छ। झापाबाट इलामसम्म प्रतिकिलो करिब दुई सय रुपैयाँमा आउने सामानको ढुवानी खर्च पाँच सयदेखि छ सय रुपैयाँ पुगेको छ। यसले तरकारी, फलफूल र खाद्यान्नको मूल्य बढाएको छ। खाना पकाउने एलपी ग्यासको आपूर्तिमा समस्या हुँदा उपभोक्ताले लामो समयदेखि ग्यास पाउन सकेका छैनन्।
राजदुवालीको समस्या समाधानका लागि तत्काल सडक सुरक्षित रूपमा सञ्चालनमा ल्याउनुपर्ने, वैकल्पिक सडकका पुवा र जोगमाई खोलामा पुल निर्माणलाई प्राथमिकता दिनुपर्ने र सडकको स्थायी पुनर्निर्माण गर्नुपर्ने आवश्यकता देखिएको छ।
