सरकारले चार पटक लिखित सहमति गरे पनि मिटरब्याज पीडितहरूले न्याय नपाएपछि धनुषाको ढल्केवरबाट काठमाडौँसम्म ‘न्याय मार्च’ सुरु गरेका छन्। मिटरब्याजविरुद्ध किसान–मजदुर आन्दोलन, नेपालको आयोजनामा यो पैदल यात्रा अघि बढेको हो।
जनकपुरधामको तिरहुतियागाछीमा बिहीबार साँझ ५ बजे हिँडेका पीडितहरू यात्राको दोस्रो दिन बिहानै ढल्केवर आइपुगेका छन्। उनीहरू धनुषाको महेन्द्रनगर हुँदै महोत्तरीको बर्दिवासतर्फ अगाडि बढिरहेका छन्। यो टोली करिब एक साताभित्र सङ्घीय राजधानी काठमाडौँ पुग्ने अनुमान गरिएको छ।
पीडितहरूका अनुसार, राज्यले गरेका वाचा कागजमै सीमित भएपछि सरकारलाई घचघच्याउन यो पैदल यात्रा तय गरिएको हो।
साहुमहाजनको ऋणको चक्रव्यूहमा फसेका किसान र मजदुरहरू न्याय नपाएसम्म आन्दोलन नरोक्ने अडानसहित सडकमा उत्रिएका छन्।
