मन्त्रीलाई हेलिकप्टर, जनतालाई अस्पताल जान साधन छैन: रास्वपा सांसद गेलाल
राष्ट्रिय स्वतन्त्र पार्टी (रास्वपा) का सांसद पारसमणि गेलालले मन्त्रीहरूको कार्यशैली र सरकारी स्रोतको दुरुपयोगप्रति कडा आपत्ति जनाएका छन्। सोमबार प्रतिनिधिसभाको बैठकमा बोल्दै सांसद गेलालले मन्त्रीहरू मन्त्रालयमा बसेर काम गर्नुको साटो प्रचारमुखी भ्रमणमा व्यस्त भएको भन्दै आलोचना गरे।
उनले जनताले आधारभूत स्वास्थ्य सेवा समेत नपाइरहेको अवस्थामा मन्त्रीहरू भने हेलिकप्टर सयर र भिडियो प्रचारमा रमाएको टिप्पणी गरे। ‘मन्त्रीलाई सामान्य रुघा लाग्दा हेलिकोप्टर उपलब्ध हुन्छ, तर सामान्य नागरिकले अस्पताल जाने साधन पाउँदैनन्,’ गेलालले भने।
हालै पूर्वाधार विकासमन्त्री सुनील लम्साललाई स्वास्थ्यमा सामान्य समस्या हुँदा सेनाको हेलिकप्टरमार्फत धनगढीबाट काठमाडौँ ल्याइएको सन्दर्भमा उनले यस्तो बताएका हुन्। जनता बिरामी हुँदा अस्पताल पुग्ने साधन नहुने र अस्पतालमा डाक्टर समेत नहुने अवस्था रहेको उनले औंल्याए।
सांसद गेलालले मन्त्रीहरूलाई देश घुम्न नहिँड्न आग्रह गर्दै उनीहरूमा समस्या समाधान गर्ने हुटहुटी छ कि देश घुम्ने रहर मात्र छ भनी प्रश्न गरे। उनले बिदामा घुम्न गए जस्तो गर्नुभन्दा मन्त्रालयमा बसेर नीति बनाउन सुझाव दिए।
