नेपाली कांग्रेसकी सांसद रेखाकुमारी यादवले सरकारका मन्त्रीहरूले नियम कानुनको धज्जी उडाउँदै अभिव्यक्ति दिइरहेको भन्दै संसद्मा प्रश्न उठाएकी छन्। मंगलबार संसद् बैठकमा बोल्दै उनले मन्त्रीहरूका पछिल्ला अभिव्यक्तिहरू अराजक रहेको र त्यसले कानुनको शासनलाई चुनौती दिएको आरोप लगाइन्।
सांसद यादवले अर्थमन्त्री स्वर्णिम वाग्लेले रोष्टमबाट सांसदहरूलाई धम्क्याउने अभिव्यक्ति दिएकोमा आपत्ति जनाइन्। उनले भनिन्, ‘यदि फाइल खोल्छु भनेर धम्की दिनुहुन्छ भने, देशको नियम कानुन अन्तर्गत रहेर कारबाही गर्नुपर्छ, धम्की दिनु भएन।’
त्यस्तै, भौतिक पूर्वाधार मन्त्री सुनिल लम्सालले ठेकेदारलाई ‘काम नगरे खुट्टा भाँचिदिनु’ भनी दिएको अभिव्यक्तिप्रति पनि उनले प्रश्न गरिन्। ‘के देशमा नियम कानुन छैन? उहाँहरू सर्वमान्य हुनुभयो?’ यादवले प्रश्न गरिन्, ‘मन्त्री, प्रधानमन्त्रीज्यूहरूले कानुन नमान्ने हो भने कसले मान्ने?’
यसैबीच, गृहमन्त्री सुदन गुरुङको विषयमा गठित छानबिन समितिको प्रतिवेदन सदनलाई जानकारी नदिई उनलाई पुनः सरकारमा फर्काइएको भन्दै यादवले आक्रोश व्यक्त गरिन्।
सांसद यादवले चार बुँदे माग राख्दै प्रधानमन्त्री बालेन्द्र शाहको विवादित अभिव्यक्तिबारे स्पष्ट जवाफ, अर्थमन्त्रीको अभिव्यक्तिबारे स्पष्टीकरण, गृहमन्त्रीको छानबिन प्रतिवेदन सार्वजनिक गरिनुपर्ने र मन्त्रीहरूको विवादित अभिव्यक्ति संसद्को रेकर्डबाट हटाइनुपर्ने माग गरिन्।
