मोरङको सुनवर्षी नगरपालिका–९ मा चार वर्षीया कायानत खातुनको मृत्यु प्रकरणले महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सीता बादीको गम्भीर ध्यानाकर्षण भएको छ।
घटनाबारे जानकारी पाएलगत्तै मन्त्री बादीले मोरङका प्रमुख जिल्ला अधिकारीसँग टेलिफोन संवाद गरी घटनाको अवस्था बुझेकी हुन्।
उनले निष्पक्ष, द्रुत र प्रभावकारी अनुसन्धान गरी सत्यतथ्य सार्वजनिक गर्न निर्देशन दिइन्। घटनामा संलग्न जो–कोहीलाई कानुनबमोजिम कडा कारबाही सुनिश्चित गर्न उनले जोड दिइन्।
मन्त्री बादीले पीडित परिवारप्रति समवेदना व्यक्त गरिन्। उनले आवश्यक सहयोग उपलब्ध गराउन सम्बन्धित निकायलाई आग्रह गरिन्।
बालिकामाथि हुने हिंसा र अपराधमा सरकारको शून्य सहनशीलता नीति रहेको उनले दोहोर्याइन्। न्याय सुनिश्चित गर्न कुनै कसर बाँकी नराख्न उनले निर्देशन दिइन्।
