मोरङको क्षेत्र नम्बर ६ मा नेपाली कांग्रेसको अधिवेशन झडपमा परिणत भएको छ। यस घटनामा तीन जना घाइते भएका छन् र अधिवेशन प्रक्रिया अनिश्चित बनेको छ।
केन्द्रीय उपमहासचिव डा. डिला संग्रौलाले क्षेत्रीय सभापति देबु तामाङको योजनामा आक्रमण भएको आरोप लगाइन्। उनले तामाङलाई पार्टीबाट निलम्बन गर्नुपर्ने माग गरिन्। तामाङले भने संग्रौलाकै कारण झडप भएको दाबी गरे।
तामाङका अनुसार, मनोनयन दर्ता हुनुअघि नै झडप भएको थियो। जिम्मेवारी खोसेर अर्कैलाई दिइएको विषयमा विवाद हुँदा कार्यक्रम सुरु हुनै लाग्दा तोडफोड भयो। उनले डिला संग्रौलाले अशोक रिजाललाई प्रदेश सभापतिको उम्मेदवार बनाएको र मात्रिका चापागाईंलाई उठाउने विषयमा झगडा भएको बताए।
संग्रौलाले आफू प्रमुख अतिथि रहेको र सभापतिको निर्देशनमा फलाम प्रहार गरी आक्रमण भएको बताइन्। चेतराज रेग्मी, सौरभ पोखरेलसहित तीन जना घाइते भएको उनले जानकारी दिइन्। दर्जनौं घाइते भएकामा तीन जनाको उपचार भइरहेको छ। उनले क्षेत्रीय सभापति देबु तामाङलाई कारबाही गर्न माग गरिन्।
क्रियाशील सदस्यताको विषयलाई लिएर भएको विवादले उग्र रूप लिँदा कार्यक्रमस्थलमा तोडफोड र कुटपिट भएको हो। कांग्रेसकी केन्द्रीय सहमहामन्त्री डा. डिला संग्रौलामाथि हातपात तथा दुर्व्यवहार भएको छ। पार्टीका क्षेत्रीय कार्यवाहक सभापति एवं पूर्वसांसद चुमनारायण तबदार, नेता चेतराज रेग्मी र समुन्द्र पोखरेलमाथि कुटपिट भएको छ।
मनोनयन दर्ता हुनुअघि नै प्रतिनिधिको नामावलीलाई लिएर विवाद बढेपछि दुई पक्षबीच झडप भएको हो। सुन्दरहरैँचा–४ स्थित सिक्देल बन्धु समन्वय प्रतिष्ठानमा मनोनयन दर्ताको तयारी भइरहेका बेला विवाद चर्किएको थियो। जिल्ला प्रहरी कार्यालय मोरङका डीएसपी मकेन्द्रकुमार मिश्रका अनुसार झडपमा केही नेता–कार्यकर्ता घाइते भएका छन्। उनीहरूलाई विराटनगरस्थित नोबेल अस्पताल लगिएको छ।
प्रहरीका अनुसार, झडपमा करिब ५ दर्जन कुर्सी तोडफोड भएका छन्। प्रतिनिधि छनोटको नामावलीमा एक महिलाको नाम समावेश नभएको विषयबाट विवाद सुरु भएको थियो। माइन्युट लेख्ने क्रममा ती महिलाले आफ्नो नाम नपरेको कुरा उठाएपछि विवाद बढेको थियो। यस घटनाले अधिवेशनस्थलको सुरक्षा व्यवस्थामाथि प्रश्न उठाएको छ।
मोरङ–६ नेपाली कांग्रेसका नेता डा. शेखर कोइरालाको निर्वाचन क्षेत्र हो। यसअघि मंगलबार मात्रै मोरङ–१ मा कांग्रेस क्षेत्रीय सभापतिका उम्मेदवार देवराज चाम्लिङ राई र मोरङ जिल्ला सभापति डिगबहादुर लिम्बूबिच हात हालाहाल भएको थियो।
