काठमाडौं र धादिङ जोड्ने नागढुंगा–सिस्नेखोला सुरुङमार्ग साउनभित्र सञ्चालनमा आउने तयारी छ। यसको निर्माण अन्तिम चरणमा छ। आधुनिक ‘टोल’ प्रणाली लागू गरिनेछ।
सुरुङमार्ग प्रयोगबापतको शुल्क सङ्कलनका लागि आरएफआईडी (रेडियो फ्रिक्वेन्सी आइडेन्टिफिकेसन) चिपमा आधारित प्रिपेड ट्याग वा कार्ड जारी गर्न नेपाल राष्ट्र बैंकले वाणिज्य बैंकहरूलाई अनुमति दिएको छ। यो नेपालको यातायात र वित्तीय क्षेत्रका लागि नयाँ अभ्यास हो।
शुल्क नगद, डिजिटल र अटोमेसन प्रणालीबाट लिइनेछ। भारतको फास्ट ट्यागजस्तै प्रविधि नेपालमा पहिलोपटक लागू गर्न आरएफआईडी गेट जडान गरिएको छ। सवारीसाधनको अगाडिको सिसामा जडान हुने चिपले खाताबाट शुल्क कटौती गरी गेट स्वचालित रूपमा खोल्नेछ।
आयोजनामा २,५५७ मिटरको सहायक आपत्कालीन सुरुङमार्ग र २,६८८ मिटर लामो, ९.५ मिटर चौडाइको तीन लेनको मुख्य सुरुङमार्ग बनेको छ। मुख्य सुरुङका दुई लेन ३.५–३.५ मिटरका र एउटा २.५ मिटरको छ। काठमाडौं भित्रिने दुई लेन र बाहिरिने एक लेन छुट्याइएको छ।
मुख्य सुरुङसँगै बनेको आपत्कालीन सुरुङमा ७ वटा क्रस प्यासेज छन्। यसले दुर्घटना वा सवारी बिग्रिएमा यात्रुको तत्काल उद्धारमा सहयोग पुर्याउनेछ। आपत्कालीन सुरुङ ४.५ मिटर चौडाइ र ५ मिटर उचाइको छ।
सुरुङभित्र सिसिक्यामेरा, फ्यान, फायर हाइड्रेन्ट, अलार्मलगायत अत्याधुनिक सुरक्षा प्रविधि जडान गरिएको छ।
सुरुङमार्ग निर्देशिकाले पैदलयात्री, दुईपाङ्ग्रे, तीनपाङ्ग्रे र इन्जिन नभएका सवारीलाई प्रवेश निषेध गरेको छ। १८ मिटर लम्बाइ, २.५ मिटर चौडाइ, ४.७५ मिटर उचाइभन्दा बढी वा तोकिएको भारभन्दा बढी बोकेका सवारीलाई पनि प्रवेश छैन। मट्टितेल, डिजेल, पेट्रोल, ग्यास, विस्फोटक पदार्थ, हातहतियार, स्वास्थ्यमा असर पार्ने वा दुर्गन्धित मालसामान बोकेका सवारीलाई पनि प्रवेश निषेध छ।
सुरुङमार्गबारे जनचेतना अभिवृद्धि गर्न शनिबार ‘नागढुंगा टनेल रन एण्ड वाक’ आयोजना गरिएको थियो। सडक विभाग र जाइकाको आयोजनामा भएको यो कार्यक्रमले सुरुङमार्गको प्रवर्द्धनमा सहयोग पुग्ने अपेक्षा छ।
